Frumtak hefur fest kaup á hlut í DataMarket ehf. fyrir 140 milljónir króna.
DataMarket hjálpar fólki að finna og skilja töluleg gögn. Fyrirtækið hefur þróað og rekur gríðarmikið safn slíkra gagna frá tugum alþjóðlegra fyrirtækja og stofnanna, svo sem Sameinuðu Þjóðunum, Alþjóðabankanum, Eurostat og BP. Lausnir DataMarket gera notendum kleift að leita í, bera saman og skoða myndrænt gögn þessarra aðila á einum stað. Auk þess veitir fyrirtækið bæði gagnaveitum og notendum gagna ýmiskonar þjónustu byggða á þessum sömu lausnum. Hjá félaginu starfar hópur sérfræðinga með mikla reynslu í upplýsingatækni og gagnavinnslu.
„DataMarket er spennandi fyrirtæki“ sagði dr. Eggert Claessen, framkvæmdastjóri Frumtaks. „Félagið hefur brotið blað í framsetningu gagna og aðgengi að gögnum á netinu. Lausnir félagsins eiga tvímælalaust erindi á heimsmarkað og það er ánægjuefni að Frumtak geti lagt félaginu lið í að styrkja alþjóðlegt markaðsstarf og nýta það tækniforskot sem félagið hefur“.
Frumtak er samlagssjóður í eigu Nýsköpunarsjóðs atvinnulífsins, sex af stærstu lífeyrissjóðum landsins og þriggja banka. Frumtak fjárfestir í nýsköpunar- og sprotafyrirtækjum sem þykja vænleg til vaxtar og útrásar. Markmið Frumtaks er að byggja upp öflug fyrirtæki sem geta verið leiðandi á sínu sviði og um leið skilað góðri ávöxtun til fjárfesta. Frumtak fjárfestir í fyrirtækjum sem eru komin af klakstigi og er áskilið að fyrir liggi ítarlegar viðskiptaáætlanir.
