*

mánudagur, 26. október 2020
Innlent 21. september 2020 17:25

Full póstþjónusta hjá Samkaup

Samningur milli Samkaupa og Póstsins nær til 21 verslunar hjá Samkaupum. Opnar á möguleika um afhendingu áfengis.

Ritstjórn
Birgir Jónsson og Sesselía Birgisdóttir, frá Póstinum, og Heiður Björk Friðbjörnsdóttir og Gunnar Egill Sigurðsson, frá Samkaupum, við undirritun samningsins.
Aðsend mynd

Samkaup og Pósturinn hafa gert með sér samstarfssamning um póstþjónustu í 21 verslun Samkaupa um land allt. Samkomulagið felur í sér að sex verslanir Samkaupa bjóða upp á fulla póstþjónustu. Frá þessu er greint í fréttatilkynningu.

Í fimm verslunum verður hægt að nálgast pakkasendingar í Pakkaportum og í tíu verslunum verður komið upp sjálfsafgreiðslu Póstboxum þar sem hægt er að nálgast pakkasendingar allan sólarhringinn. Markmiðið er að tvöfalda afhendingarstaði Póstsins á næstu mánuðum.

Sjá einnig: Pósturinn fer færeysku leiðina

„Við erum gríðarlega stolt af samstarfinu við Póstinn því nú getum við boðið viðskiptavinum okkar upp á enn betri nærþjónustu, sem er eitt af megin markmiðum Samkaupa. Nú er hægt að gera innkaupin og sækja póstsendingar á einum og sama staðnum,“ segir Gunnar Egill Sigurðsson, framkvæmdastjóri verslunarsviðs Samkaupa.

„Samkaup er leiðandi matvöru-verslana á Íslandi í netverslun og tækni og þetta er enn ein nýjungin í þeim efnum. Samstarfið opnar einnig á ýmsa möguleika til framtíðar litið þar á meðal afhendingu á lyfjum, áfengi og fleiru.“