Konráð S. Guðjónsson,aðstoðarframkvæmdastjóri og hagfræðingur Viðskiptaráðs, hefur bæst í hóp þeirra sem furðar sig á ályktun Ásgeirs Jónssonar Seðlabankastjóra um að hækkanir á fasteignarmarkaði síðastliðið ár séu vegna íbúðaskorts.
Í Twitter færslu bendir Konráð á að aldrei áður hafi verið byggt jafn mikið af íbúðum og að ekki hafi verið byggt jafn mikið umfram fólksfjölgun í áratug. Þá séu vísbendingar á lofti um að uppbygging íbúða sé að færast í aukana að nýju.
Kristrún Frostadóttir , oddviti samfylkingarinnar í Reykjavík suður, gagnrýndi fyrr í dag ummæli Ásgeirs í Fréttablaðinu um að þétting byggðar og takmarkað framboð af lóðum á höfuðborgarsvæðinu útskýrði þær miklu hækkanir sem hafa átt sér stað á fasteignamarkaði það sem af er ári.
Telur Seðlabankastjóra fara með rangfærslur
Þá telur Konráð að Ásgeir fari með rangfærslur varðandi heimildir um fjármagnshöft. Ásgeir sagði við Fréttablaðið að „það heyrðist ekkert frá Húsi atvinnulífsins nema eitthvert tuð um að Seðlabankinn hefði allt í einu fengið heimild til að setja á fjármagnshöft. Sú heimild hefur verið til staðar í áratugi. Þessar breytingar leiða til þess að Ísland er tekið af lista OECD yfir lönd sem eru með fjármagnshöft."
„Önnur saga kannski, en jafnvel enn furuðulegra og hreinlega rangt. Hið rétta var að það átti að hafa heimild til að setja varanleg fjármagnshöft með reglugerð. Það var nýtt og var enda sett skilyrði að slíkt gæti aðeins verið tímabundið í endanlegum lögum," segir Konráð í færslunni.
Konráð bætir þó við að sveitarfélög gætu „látið skipulagsferlið ganga hraðar og auðveldar fyrir sig - þar hlýtur að vera hægt að gera betur. Það hefur vafalítið haft áhrif á verð, bara alls ekki síðasta ár eða svo, heldur árin á undan.“
Furðuleg ályktun seðlabankastjóra að íbúðaverðshækkanir sl. ár séu vegna íbúðaskorts.
— Konráð S. Guðjónsson (@konradgudjons) July 1, 2021
1) Það hefur ekki verið svona mikið byggt umfram fólksfjölgun í meira en áratug
2) Það hefur bókstaflega aldrei verið byggt jafn mikið
3) Vísbendingar um að íbúðauppbygging sé að aukast aftur pic.twitter.com/TuLdsaVXwy