Sjálfstæðisflokkur og Píratar hefðu meirihluta á Alþingi ef gengið yrði til kosninga um þessar mundir ef marka má niðurstöður nýrrar skoðanakönnunar Félagsvísindastofnunar Háskóla Íslands. Samkvæmt henni mælist fylgi Sjálfstæðisflokks nú 28,2% og fylgi Pírata 25,8% eða samanlagt 54%. Þetta kemur fram í frétt Morgunblaðsins í dag.
Niðurstöðurnar eru ögn frábrugðnar niðurstöðu könnunar Gallup sem framkvæmd var sl. mánaðamót en þá sögðust 26,6% kjósa Pírata ef gengið væri til kosninga nú og rúm 27% Sjálfstæðisflokk.
Stuðningur við VG í könnun Félagsvísindastofnunar mælist 18,9%, en flokkurinn virðist vera í mikilli sókn þessa dagana. 8,9% segjast styðja Samfylkingu og 8,2% Framsóknarflokk. Þá sögðust 4,4% vilja kjósa Bjarta Framtíð og 3,5% Viðreisn.
Könnunin var framkvæmd fyrir síðustu helgi og var haft samband yfir netið við 2.003 manns. Svör bárust frá 47% þeirra sem voru í úrtakinu eða 937.