Landhelgisgæslan hefur ákveðið að taka tilboði Knut Axel Ugland Holding AS um leigu á þyrlu af gerðinni Aerospatiale Super Puma AS332 L1, sem er sömu tegundar og björgunarþyrlur Landhelgisgæslunnar TF-LIF og TF-GNA.

Leiguþyrlan mun leysa af TF-LIF sem flýgur til Noregs 14. janúar nk. þar sem hún mun í fyrsta sinn fara í gegnum umfangsmikla G-skoðun. Áætlað er að skoðuninni ljúki 23. mars.

Þetta kemur fram á vef Landhelgisgæslunnar en leiguþyrlan verður afhent Landhelgisgæslunni um mánaðarmótin janúar-febrúar. Til að þyrlan uppfylli öll skilyrði útboðsgagna til björgunarþyrlu þarf að gera á henni smávægilegar breytingar sem verða framkvæmdar annaðhvort í Noregi eða á Íslandi.

Fram kemur á vef Landhelgisgæslunnar að starfsmenn á vegum Gæslunanr hafa verið í Noregi undarfarna daga þar sem unnið er að lokafrágangi fyrir samningsgerð ásamt því að undirbúa skráningarferli hjá íslenskum flugmálayfirvöldum sem getur tekið nokkurn tíma en vonast er til að þyrlan verði tilbúin til notkunar um eða uppúr miðjan febrúar.

TF-LIF Aerospatiale Super Puma AS-332 L1 getur tekið fimm í áhöfn og allt að tuttugu farþega, flugþol hennar eru fimm klukkustundir og hámarkshraði er 270 km/klst. Hámarks flugdrægni er 625 sjómílur. TF-GNA, einnig Aerospatiale Super Puma AS-332 L1 er systurþyrla, TF-LIF og getur tekið fimm manna áhöfn og svipaðan fjölda farþega, flugþol hennar er 4:45 klukkustundir og hámarkshraði 270 km/-  klst. Hámarks flugdrægni er 570 sjómílur. Þyrla Knut Axel Ugland Holding AS er sambærileg í getu og núverandi þyrlur Landhelgisgæslunnar.