Svissneski fjárfestingarbankinn UBS hefur endurráðið Sergio Ermotti sem forstjóra. Hann tekur við stöðunni af Ralph Hamers rúmum tveimur vikum eftir að bankinn samþykkti að kaupa Credit Suisse fyrir 3,25 milljarða dala.
Ermotti, sem var forstjóri UBS á árunum 2011-2020, tekur formlega aftur við stöðunni þann 5. apríl næstkomandi. Hamers mun starfa áfram hjá UBS sem ráðgjafi á meðan bankinn aðlagar sig að breytingum í kjölfar yfirtökunnar á Credit Suisse.
Stjórn UBS segist í tilkynningu hafa tekið ákvörðunina í ljósi nýrra áskorana og forgangsverkefna sem bankinn standur frammi eftir yfirtökuna. Stjórnin sagði Ermotti hafa tekist að leiða UBS í gegnum endurskipulagningu í kjölfar fjármálahrunsins árið 2008.
Stjórnarformaður UBS, Colm Kelleher, sagði á blaðamannafundi í dag að hann hefði hringt í Ermotti strax á mánudaginn í síðustu viku, aðeins örfáum klukkutímum eftir að yfirtakan var samþykkt, til að athuga hvort hann hefði áhuga á að snúa aftur í forstjórastólinn.
