Kostnaður íslenskra fyrirtækja af nýju persónuverndarlöggjöfinni, GDPR, nemur yfir milljarði króna á ári samkvæmt áætlunum Viðskiptaráðs Íslands. Niðurstaðan byggir á könnun sem Viðskiptaráð gerði meðal aðildarfélaga sinna af kostnaði við persónuverndarlöggjöfina. 78 fyrirtæki svöruðu könnuninni, en þau áætla að til frambúðar verði kostnaður tengdur löggjöfinni ríflega 320 milljónir króna á ári. Þar af er kostnaður við persónuverndarfulltrúa um 70% en annar kostnaður um 30%.

Kosti yfir milljarð á ári

Því til viðbótar nam samanlagður kostnaður stóru bankanna þriggja, Arion banka, Íslandsbanka og Landsbankans, við innleiðingu löggjafarinnar um 300 milljónum króna. Þá áætla bankarnir að kostnaður þeirra vegna persónuverndarfulltrúa verði samanlagt um 100 milljónir króna á ári til frambúðar. „Þetta eru háar fjárhæðir, sérstaklega þegar ríkisstjórnin er með í vinnslu hvítbók um hvernig megi lækka kostnað í íslensku fjármálakerfi,“ segir Gunnar Dofri Ólafsson, lögfræðingur Viðskiptaráðs Íslands.

Endurspegli úrtakið atvinnulífið í heild áætlar Viðskiptaráð að vinnustundir við innleiðingu löggjafarinnar hafi verið um 160 þúsund, eða um mánaðarvinna ríflega 900 manns og árlegur kostnaður atvinnulífsins til frambúðar sé varlega áætlaður tæplega 1,3 milljarðar króna. Hafa ber þó í huga að úrtakið í könnuninni er sjálfvalið. Könnunin byggir á svörum við spurningalista sem sendur var á aðildarfélög Viðskiptaráðs. Því kann að vera að úrtakið endurspegli ekki kostnað viðskiptalífsins í heild.

Lækki aðrar álögur á móti

Gunnar Dofri segir að Viðskiptaráði og aðildarfélögum þess sé umhugað um persónuvernd. „Við erum hins vegar ekki á því að einkafyrirtæki eigi ein að bera þennan kostnað, því hann bætist bara við allan þann kostnað sem íslensk fyrirtæki þurfa þegar að standa undir. Til að létta undir með íslenskum fyrirtækjum teljum við því rétt að ríkið komi til móts við fyrirtækin og létti álögur á þau vegna þessa aukna kostnaðar, sem kemur til vegna lagaboðs. Þannig mætti til dæmis lækka tryggingagjald eða tekjuskatt,“ segir Gunnar Dofri.

Nánar er fjallað um málið í Viðskiptablaðinu. Áskrifendur geta nálgast pdf-útgáfu af blaðinu með því að smella á hlekkinn Tölublöð .