*

miðvikudagur, 1. apríl 2020
Innlent 18. desember 2019 17:34

Gefa út skuldabréf fyrir 12,3 milljarða

Landsnet nýtir fjármagnið til að endurgreiða stofnlán frá Landsvirkjun og í fjármögnun á hluta af fjárfestingum næsta árs.

Ritstjórn
Guðmundur Ingi Ásmundsson er forstjóri Landsnets.
Aðsend mynd

Landsnet hefur gefið út óveðtryggð skuldabréf að fjárhæð 100 milljónir bandaríkjadollara (12,3 milljarðar króna) á gjalddaga eftir tíu til tólf ár. Bréfin voru seld til alþjóðlegra fagfjárfesta í lokuðu skuldabréfaútboði í Bandaríkjunum og verða ekki skráð í Kauphöll. Greint er frá þessu í fréttatilkynningu.

Guðlaug Sigurðardóttir, framkvæmdastjóri fjármála hjá Landsneti, segir í tilkynningunni að það sé ánægjulegt að sjá að enn sem fyrr sé mikill áhugi erlendra fjárfesta á félaginu. Rekstur félagsins sé stöðugur,  fjárhagsstaðan sterk og mikill áhugi sé á innviðafyrirtækjum eins og Landsneti.

„Í hópi þeirra fjárfesta sem tóku þátt í þessari skuldabréfaútgáfu eru bæði aðilar sem tóku þátt í síðustu skuldabréfaútgáfu félagsins á árinu 2016 sem og nýir fjárfestar. Áhugi þeirra var, eins og í fyrra útboði, mikill og bárust tilboð í rúmlega tvöfalda þá fjárhæð sem fyrirtækið leitaði eftir. Skuldabréfaútgáfan er á betri kjörum en síðasta skuldabréfaútgáfa félagsins sem endurspeglar aukið traust fjárfesta á okkur og Íslandi. Með þessari útgáfu höfum við aflað fjármagns til að endurgreiða stofnlán frá Landsvirkjun auk fjármögnunar á hluta af fjárfestingum félagsins á næsta ári," segir hún.