Berkshire Hathaway, fjárfestingarfélag Warren Buffett, hefur staðfest kaup á fyrirtækinu Precision Castparts Corp (PCC) fyrir 37,2 milljarða dali. Í kjölfarið hækkaði gengi hlutabréfa í fyrirtækinu um 19% á bandarískum markaði. BBC News greinir frá þessu.
Precision Castparts framleiðir búnað fyrir flug-, olíu- og gasiðnað og var markaðsvirði þess um 26,7 milljarðar dala fyrir viðskiptin, en ætla má að það sé nú orðið öllu hærra.
Um er að ræða stærsta samning sem Buffett hefur gert á ferlinum, en fjárhæðin jafngildir tæpum 5.000 milljörðum íslenskra króna. Berkshire Hathaway átti fyrir um 3% í fyrirtækinu.
