Hlutabréfaverð Credit Suisse hefur hækkað um nærri 20% í fyrstu viðskiptum í dag eftir að svissneski bankinn tilkynnti að hann hyggist taka lán fyrir allt að 50 milljarða franka, eða sem nemur 54 milljörðum dala, frá Seðlabanka Sviss og greiða niður skuldir fyrir um 3 milljarða franka til að bæta lausafjárstöðu sína og róa fjárfesta.
Credit Suisse sagðist í tilkynningu hafa tekið ákvörðun um að styrkja lausafjárstöðu sína með nýrri lánalínu frá seðlabankanum í forvarnarskyni.
Seðlabanki Sviss sendi frá sér yfirlýsingu í gærkvöldi þar sem hann sagðist vera tilbúinn að útvega Credit Suisse lausafé í kjölfar þess að gengi bankans tók dýfu í gær.
Lækkun á hlutabréfaverði Credit Suisse hefur m.a. verið rakinn til óróa í bankageiranum í kjölfar falls Silicon Valley Bank og Signature Bank í Bandaríkjunum. Þá lýsti stjórnarformaður Saudi National Bank, stærsta hluthafa Credit Suisse, því yfir að hann hyggist ekki veita svissneska bankanum frekari fjárhagsaðstoð eftir að hafa keypt 10% hlut í fyrra.
Greinandi hjá RBC sagði við Financial Times að sterkari lausafjárstaða Credit Suisse og stuðningur seðlabankans hjálpi til við að endurheimta traust svissneska bankans. Áfram ríki þó óvissa í kringum bankann.
