Sé gert ráð fyrir því að áætlanir um útgjöld ríkissjóðs árið 2015 fylgi sömu þróun og síðustu áratugi má ætla að endanleg útgjöld skv. ríkisreikningi verði 55 milljörðum króna meiri en samþykkt var í fjárlögum, eða 710 milljarðar króna. Kemur þetta m.a. fram í nýrri greiningu efnahagssviðs Samtaka atvinnulífsins. Fjallað er um málið á vefsíðu SA .
Þar segir að þótt gert sé ráð fyrir afgangi af rekstri ríkissjóðs sé hann að að mestu tilkominn vegna einskiptistekna fyrir árið 2014 og árið 2015 verði hann hverfandi. Auknum tekjum sé mætt með auknum útgjöldum.
Í greiningunni kemur fram að ríkisútgjöld lækkuðu lítið eftir hrun ef frá er talinn einskiptiskostnaður og var halla snúið í afgang að mestu leyti með hækkun skatta. Raunar stefni í að árin 2014 og 2015 verði ríkisútgjöld orðin hærra hlutfall af landsframleiðslu en nokkru sinni fyrir bankahrun, eða um 34%.
„Áætlaður afgangur á árinu 2015 er það lítill að ætla má að meginmarkmið sé að skila hallalausum rekstri frekar en að greiða niður skuldir eða skapa svigrúm til að lækka álögur. Lítið má því út af bregða til að ríkissjóður verði aftur rekinn með halla.
Þessi stefna er mörkuð nú þegar skuldastaða íslenska ríkisins hefur sjaldan verið alvarlegri og vaxtakostnaður er orðinn einn stærsti útgjaldaliður ríkissjóðs. Sé ætlunin að minnka þá byrði og koma skuldum aftur í sjálfbært horf er nauðsynlegt að líta til eignasölu samhliða hagræðingu í rekstri.
Með hliðsjón af fyrri reynslu er óábyrgt að haga ríkisfjármálum eins og framtíðin sé fyrirséð, björt og fögur. Tekjustofnar geta brugðist og vaxtakjör geta versnað. Mikilvægt er að ríkissjóður búi í haginn og verði viðbúinn áföllum þegar þau verða því í því samhengi er ekki spurning um hvort heldur hvenær,“ segir í greiningunni.
