*

þriðjudagur, 22. september 2020
Innlent 3. júlí 2020 16:30

Gera úrbætur á 64 fjarskiptastöðvum

Sigurður Ingi Jóhannsson, samgöngu- og sveitarstjórnarráðherra, kynnti nýverið að verkefnið fengi 125,5 milljóna kr. fjárveitingu.

Ritstjórn
Eyþór Árnason

Neyðarlínan vinnur nú að því að gera úrbætur á 64 fjarskiptastöðvum víða um land með auknu varaafli og að fjölga færanlegum vararafstöðvum. Frá þessu er greint á vef Stjórnarráðsins.

Þar af eru 36 fastar vararafstöðvar en annars staðar eru rafgeymar eða tenglar fyrir færanlegar rafstöðvar. Tilgangurinn er að tryggja rekstraröryggi í fjarskiptum eftir mikil óveður sem gengu yfir landið í vetur. 

Sigurður Ingi Jóhannsson, samgöngu- og sveitarstjórnarráðherra, kynnti nýverið að verkefnið fengi 125,5 milljóna kr. fjárveitingu á þessu ári á vegum fjarskiptasjóðs í tengslum við landsátakið Ísland ljóstengt. Fjárveitingarnar eru veittar á grundvelli fjárfestingaátaks stjórnvalda til að sporna gegn samdrætti í hagkerfinu í kjölfar heimsfaraldurs kórónuveiru. 

„Óveðrið sem gekk yfir landið í vetur afhjúpaði marga veikleika í grundvallarkerfum okkar, rafmagnskerfinu og fjarskiptakerfinu. Sú vinna sem er hafin er hjá Neyðarlínunni með stuðningi fjarskiptasjóðs er mikilvægt skref í að tryggja örugg samskipti um allt land,“ segir Sigurður Ingi Jóhannsson, samgöngu- og sveitarstjórnarráðherra.

Samstarf við Mílu, fjarskiptafélögin og RÚV

Neyðarlínan og fjarskiptasjóður hafa átt í nánu samstarfi við Mílu, fjarskiptafélögin Nova, Símann og Sýn (Vodafone) og Ríkisútvarpið um úrbæturnar. Í lok síðasta árs var sett af stað vinna að frumkvæði Neyðarlínunnar að fara ofan í saumana á því hvað þyrfti að gera til að bæta rekstraröryggi fjarskiptastöðva og tryggja að almenningur geti kallað eftir aðstoð í neyðarnúmerið 112 í vá eins og skapaðist í óveðrum síðasta vetur.

„Út úr þessari vinnu voru lagðar fram tillögur sem yfirvöld ákváðu að styðjast við,“ segir Þórhallur Ólafsson, framkvæmdastjóri Neyðarlínunnar. „Sú vinna er komin á fullt og í fyrri áfanga verksins á þessu ári verður unnið að úrbótum á 64 stöðum víða um land. Stefnt er að því að hefja seinni áfanga verkefnisins á næsta ári sem mun ná til þess hluta landsins sem eftir verður að loknu fyrri áfanga,“ segir Þórhallur.

Í fyrsta áfanga verður unnið að verkefnum á Vesturlandi, Vestfjörðum, Norðurlandi og Austurlandi. formað er að 100 milljónir bætist við þetta verkefni á næsta ári. Þá verður hugað að varaaflstöðvum á Suðurlandi og suðvesturhorni landsins.