*

mánudagur, 6. desember 2021
Innlent 12. mars 2021 12:13

Gildi leggst gegn starfskjarastefnu

Lífeyrissjóðurinn mun gera athugasemdir við og greiða atkvæði gegn tillögu stjórnar Arion banka um starfskjarastefnu.

Ritstjórn
Haraldur Guðjónsson

Lífeyrissjóðurinn Gildi mun gera athugasemdir við og greiða atkvæði gegn tillögu stjórnar Arion banka um starfskjarastefnu sem lögð verður fram á aðalfundi félagsins næsta þriðjudag. Þetta kemur fram í tilkynningu á vef Gildis.

Í bókun frá Gildi sem lögð verður fram á fundinum segi m.a.: „Stjórn bankans hefur ekki með fullnægjandi hætti rökstutt þörfina og tilgang þess að nýta heimild til þess að koma á fót árangurstengdu launakerfi, aukningu kauprétta og áskriftarréttindum. Laun stjórnenda bankans virðast að mati sjóðsins, þegar tillit er tekið til möguleika á árangurstengdum greiðslum, kaupréttum og áskriftarréttindum, hærri en það sem gengur og gerist hjá öðrum íslenskum bönkum og skráðum fyrirtækjum sem starfa á íslenskum markaði."

Gildi muni á fundinum einnig greiða atkvæði gegn tillögu um þóknun til stjórnarmanna á þeim grundvelli að fjárhæðir sem þar eru lagðar til séu hærri en það sem gengur og gerist.

Einnig muni Gildi á fundinum greiða atkvæði gegn tillögu um nýjar starfsreglur tilnefningarnefndar á grundvelli fyrirkomulags við val á nefndarmönnum sem kalli að mati sjóðsins á meiri umræðu meðal hluthafa.