Rekstrartekjur og EBITDA Eimskip á þriðja ársfjórðungi voru þær hæstu á einum ársfjórð ungi síðan árið 2009, annan fjórðunginn í röð. Rekstrartekjur Eimskips voru 18,3 milljarðar króna (miðað við gengi 4. desember) og jukust um rúmlega 1,4 milljarða króna frá fyrra ári. EBITDA fjórðungsins nam ríflega 2,3 milljörðum og hækkaði um 29,5% frá fyrra ári, en þá var hún tæplega 1,8 milljarðar.
Uppgjör ársfjórðungsins litast töluvert vegna söluhagnaðar vegna skips í smíðum en hagnaður vegna þess nam um 282 millj ónum króna. Flutningsmagn í áætlunarsiglingum jókst um 2,8% á Norður-Atlantshafi á fjórðungnum miðað við sama fjórðung árið áður og mikill vöxtur í flutningum tengdum Íslandi. Tekjur af áætlunarsiglingum félagsins námu 13,2 milljörðum króna samanborið við 12,3 milljarða árið áður, en það er aukning um 7,4% á milli ára.
Að sögn Stefáns Brodda Guðjónssonar hjá greiningardeild Arion banka er „uppgjör Eimskips á þriðja ársfjórðungi í þokkalegu samræmi við mínar væntingar, að undanskildum bókfærðum söluhagnaði upp á tvær milljónir evra, vegna endurgreiðslu á nýsmíði í Kína sem félagið féll frá kaupum á.“ Stefán segir að Eimskip njóti góðs af öflugum vexti í innflutningi sem skýri að mestu 11% vöxt í leiðakerfi Eimskips á fjórðungnum. Útflutningur virðist vaxa hægar þó að hann sé stöðugur.
„Á þriðja ársfjórðungi hægði á vexti í flutningsmiðlun, aðallega vegna áhrifa frá Kína. Kostnaður var nokkuð lægri en ég vænti og virðist félagið hafa brugðist við áhrifum af innlendum kostnaðarhækkunum og styrkingu krónunnar,“ segir Stefán. „Á þessu ári réðst Eimskip í nokkrar, að því er virðist, vel heppnaðar yfirtökur sem hafa styrkt afkomuna. Fjárhagsstaða Eimskips virðist nokkuð rúm þannig að eflaust leitar félagið nú tækifæra til byggja frekar ofan á þær fjárfestingar,“ segir Stefán.
