Fjármála- og efnahagsráðuneytið staðfesti í dag samkomulag við Lífeyrissjóð starfsmanna ríkisins, LSR, um framsal eigna fyrir 19 milljarða króna, sem voru hluti af svonefndum stöðugleikaframlögum fallinna fjármálafyrirtækja að því er kemur fram á vef Stjórnarráðsins. Framsalið er gert á grundvelli heimildar í fjáraukalögum fyrir árið 2017 sem Alþingi samþykkti 30. desember sl.

Eignirnar eru hluti af stöðugleikaframlögum slitabúa fallinna fjármálastofnana sem komið var fyrir í eignarhaldsfélaginu Lindarhvoli. Mestur hluti þeirra eigna sem Lindarhvoli var falið að koma í verð hefur þegar verið seldur og andvirðið runnið í ríkissjóð. Talið er að hluti þeirra eigna sem eftir standa séu ekki vel fallnar til almennrar sölu með sama hætti og aðrar eignir í umsýslu félagsins sem seldar hafa verið á undanförnum misserum.

Af þessum ástæðum er talið skynsamlegt að LSR yfirtaki umræddar eignir, en sjóðurinn er ekki háður sérstökum tímatakmörkunum í eignaumsýslu sinni og býr yfir sérhæfðri þekkingu sem þarf til þess að hámarka virði eignanna. Eignirnar eru framseldar til sjóðsins sem innborgun inn á skuldbindingar ríkissjóðs gagnvart B-deild LSR. Með þeirri ráðstöfun næst að hámarka virði þeirra fyrir ríkissjóð með lágmarks tilkostnaði að því er segir á vef Stjórnarráðsins.

Ríkissjóður ber áfram ábyrgð á skuldbindingum B-deildar LSR og umrædd ráðstöfun hefur engin áhrif þar á. Standi eignirnar ekki undir því verðmati sem sett er á þær í dag leiðir það að öðru óbreyttu til hækkunar á skuldbindingum ríkissjóðs í framtíðinni, en skili eignirnar meiri verðmætum í framtíðinni hefur það jákvæð áhrif á skuldbindingarnar.