Greiðsluafkoma ríkissjóðs á fyrri árshelmingi 2016 var 400,3 milljörðum króna betri en gert var ráð fyrir á tímabilinu. Þetta kemur fram í frétt á vef Ríkisendurskoðunar .
Gert var ráð fyrir að greiðsluafkoman yrði neikvæð um 18,5 milljarða en hún var hins vegar jákvæð um 381,8 milljarða.
Það sem spilaði stærstan hluta í afkomunni voru stöðugleikaframlög frá þrotabúum fjármálstofnana að fjárhæð 394 milljarða króna.
Einungis hluti stöðugleikaframlaga talinn með
Ríkisendurskoðun gagnrýnir það að einungis hluti stöðugleikaframlagana sé talinn með í flestum yfirlitum mánaðauppgjöra ríkissjóðs. Hér er hægt að sjá gagnrýni Ríkisendurskoðunar í heild sinni;
Ríkisendurskoðun gagnrýnir að einungis hluti stöðugleikaframlagana, alls 68,0 ma.kr., sé talinn með í flestum yfirlitum mánaðaruppgjöra ríkissjóðs. Stofnunin telur eðlilegra að taka framlögin með að fullu eða halda þeim alfarið utan við samanburðinn. Væri þessum framlögum haldið utan við greiðsluuppgjörið væri afkoma ríkissjóðs á fyrri hluta ársins svipuð og á sama tíma árið 2015.
Reynsla undanfarinna ára sýnir að um þriðjungur fjárlagaliða fer fram úr fjárheimild í lok árs og bendir ýmislegt til að sú verði einnig raunin í ár. Í sumum tilvikum má fullyrða að það hafi legið fyrir í byrjun árs að grípa þyrfti til ráðstafana. Í fjáraukalögum, sem samþykkt voru 12. október, var ekki nema að hluta tekið á fyrirliggjandi vanda stofnana sem stefna í að vera með útgjöld umfram heimildir í lok árs án þess þó að lagt hafi verið fyrir viðkomandi stofnanir að draga saman útgjöld.
Ríkisendurskoðun telur að ekki sé með fullnægjandi hætti tekið á því hvernig stofnunum er ætlað að bregðast við uppsöfnuðum halla. Af svörum ráðuneyta má ráða að í mörgum tilfellum sé ekki ætlast til eða gengist eftir því að stofnanir dragi saman starfsemi til að mæta slíkum vanda. Það fyrirkomulag að ætla stofnunum að greiða upp eldri halla er því ekki að virka þegar þannig háttar til.
