Greinargerðir lögmanna sakborninga í máli sérstaks saksóknara gegn Hreiðari Má Sigurðssyni, Sigurði Einarssyni, Ólafi Ólafssyni og Magnúsi Guðmundssyni verða lagðar fram þann 1. október næstkomandi. Málið gegn fjórmenningunum var þingfest í mars síðastliðnum og hafa lögmenn fjórmenninganna því haft tæpa sjö mánuði til að vinna að greinargerðunum.
Þegar greinargerðirnar hafa verið lagðar fram veitir dómari saksóknara frest til að fara yfir þær og að gagnaöflun lokinni er dagsetning ákveðin fyrir aðalmeðferð málsins. Miðað við umfangið er ekki gefið að dómur falli í málinu fyrir áramót.