Greining Íslandsbanka gerir ráð fyrir að vísitala neysluverðs (VNV) muni hækka um 0,7% í september. Ef spá greiningardeildarinnar gengur eftir mun 12 mánaða verðbólga lækka lítillega, úr 10,9% í 10,7%.
Þetta kemur fram í Morgunkorni Íslandsbanka en Greining Íslandsbanka segir að áhrif útsöluloka verði talsverð í septembermælingu VNV og vega í heild til 0,5% hækkunar.
Þá komi áhrif af álagningu vörugjalda á ýmsa flokka matvörur fram í september og vega til 0,2% hækkunar á VNV.
Hófleg hækkun VNV út árið
„Að því gefnu að gengi krónunnar gefi ekki verulega eftir á næstunni mun draga allhratt úr hækkunartakti VNV það sem eftir lifir árs og þar með verðbólgunni,“ segir í Morgunkorni.
„Gerum við ráð fyrir 1,5% hækkun VNV til áramóta, að september meðtöldum. Á sama tíma detta miklir hækkunarmánuðir út úr 12 mánaða takti verðbólgunnar og mun hún því hjaðna hratt á þann mælikvarða. Ef spá okkar gengur eftir verður verðbólga komin undir 6% í árslok.“