Már Guðmundsson, seðlabankastjóri, sagði í viðtali við Rauters fréttastofuna í gær að Ísland myndi líklega koma út úr kreppunni á fyrri helmingi næsta árs og að hjöðnun verðbólgunnar ásamt minnkandi áhættufælni gæti gert Seðlabankanum kleift að lækka stýrivexti.

Þessi orð Más eru rifjuð upp í Morgunkorni Íslandsbanka í dag en Greining Íslandsbanka segir ljóst að framundan sé erfiður vetur í íslensku efnahagslífi.

„Líkur eru á því að atvinnuleysi eigi eftir að hækka, kaupmáttur ráðstöfunartekna eigi eftir að rýrna, húsnæðisverð eigi eftir að lækka, verðbólgan eigi eftir að vera nokkur, vextir verði háir og skattar muni verða hækkaðir svo eitthvað sé nefnt,“ segir í Morgunkorni.

„Mikil óvissa er enn um úrlausn margra mikilvægra mála við uppbyggingu efnahagslífsins sem gerir allar tímasetningar í spám um botn kreppunnar afar erfiðar. Miðað hefur áfram í ákveðnum málum en mun hægar en lagt var upp með þegar endurreisnarstarfið hófst eftir hrun bankanna fyrir um ári síðan.“

Greining Íslandsbanka segir að kreppan hafi náð botni þegar vöxtur tekur við af samdrætti í landsframleiðslu á föstu verði.

„Hagvöxtur er þá kominn til skjala á ný, en ekki er víst að hann verði ýkja mikill fyrr en innlend eftirspurn tekur við sér að nýju,“ segir í Morgunkorni.

„Það gerist tæpast með einhverjum krafti m.a. vegna þeirrar miklu skuldsetningu sem einkennir mörg íslensk heimili og fyrirtæki.“

Komum ekki út úr kreppunni á fyrri helming næsta árs

Þá segir Greining Íslandbanka að hagkerfið eigi eftir að dragast nokkuð saman áður en við sjáum hagvöxt hér á ný og þegar að því kemur muni fjárhagsleg staða fyrirtækja og heimila að öllum líkindum verða lakari en hún er nú.

„Það er alveg ljóst að talsvert lengra er í að efnahagsleg staða þessara aðila verður orðin viðunandi á ný og eitthvað nálægt því sem hún var fyrir banka- og gjaldeyriskreppuna,“ segir í Morgunkorni.

„Ísland mun þannig í hugum flestra ekki koma út úr kreppunni á fyrri helmingi næsta árs þegar atvinnuleysi verður í hámarki, kaupmáttur í lágmarki og erfiðleikar miklir hjá fjölda fyrirtækja og heimila. Það er mun lengra í að Ísland vinni sig að fullu út úr keppunni á þessa mælikvarða. Líklegast er að það gerist ekki fyrr en eftir nokkur ár.“