*

þriðjudagur, 18. janúar 2022
Fólk 2. desember 2021 14:01

Gréta María hættir hjá Brimi

Gréta María Grétarsdóttir mun láta af störfum sem framkvæmdastjóri hjá Brimi á næstu vikum.

Ritstjórn
Gréta María Grétarsdóttir
Gígja Einarsdóttir

Gréta María Grétarsdóttir hefur óskað eftir að láta af störfum sem framkvæmdastjóri nýsköpunar, samfélagsábyrgðar og fjárfestatengsla hjá útgerðarfélaginu Brimi. Gréta María mun láta af störfum á næstu vikum, samkvæmt tilkynningu félagsins til Kauphallarinnar.

„Það er eftirsjá af Grétu Maríu sem hefur reynst félaginu vel og hún hefur komið með margar góðar og ferskar hugmyndir og sýn á okkar rekstur. Við þökkum henni fyrir samstarfið og óskum henni velfarnaðar í spennandi verkefnum framundan,“ segir Guðmundur Kristjánsson, forstjóri Brims, í fréttatilkynningu.

Gréta María var ráðinn til Brims í byrjun árs. Hún var áður framkvæmdastjóri Krónunnar á árunum 2018-2020 og hlaut á þeim tíma Viðskiptaverðlaun Viðskiptablaðsins og Frjálsrar verslunar. Þar áður var hún fjármálastjóri Festi frá árinu 2018.