Guðlaugur Þór Þórðarson umhverfisráðherra hefur sent frumvarp til umsagnar sem myndi sameina tíu ríkisstofnanir í þrjár stærri stofnanir. Stofnanir ráðuneytisins eru í dag 13 með um 600 starfsmenn á um 40 starfsstöðvum víða um land.
„Um er að ræða áform um sameiningu tíu stofnana í þrjár öflugar stofnanir, Náttúruverndar- og minjastofnun, Náttúruvísindastofnun og Loftslagsstofnun. Megináhersla er lögð á að tryggja áfram fyrirliggjandi mannauð og þekkingu og að starfsfólk njóti forgangs til nýrra starfa,” segir í áformum um lagasetninguna.
Ekki gert ráð fyrir auknum útgjöldum
Greiningarvinnan hófst á fundi með forstöðumönnum í júní 2022 og lauk með greinargerð stýrihóps (frumathugun) til ráðherra í desember 2022 með tillögum um breytingar á stofnanaskipulagi.
„Gert er ráð fyrir skýrum kjarna í starfsemi hverrar stofnunar og lögð áhersla á sveigjanleika í tilfærslum verkefna milli stofnana til að auka árangur, skilvirkni og hagræðingu.“
Þar segir einnig að ekki er gert ráð fyrir auknum útgjöldum vegna lagasetningarinnar en vonast er eftir að hagræðingin muni skila hagkvæmi til lengri tíma. Ekki er gert ráð fyrir auknum útgjöldum vegna lagasetningarinnar.
„Almennt sýnir reynsla að hagræðing sem hlýst af sameiningum stofnana sé í kringum 7% og er það talið varlega áætlað miðað við verkefnið sem hér um ræðir.,“ segir í áformunum.
Samkvæmt breytingunni yrði málaflokkum ráðuneytisins skipt svo á þrjár stofnanir:
- Náttúruverndar- og minjastofnun (Vatnajökulsþjóðgarður, Þjóðgarðurinn á Þingvöllum, náttúruverndarsvið Umhverfisstofnunar og Minjastofnun)
- Náttúruvísindastofnun (Náttúrufræðistofnun Íslands, Náttúrurannsóknarmiðstöðin við Mývatn (RAMÝ),Veðurstofa Íslands, Landmælingar Íslands og ÍSOR)
- Loftslagsstofnun (Orkustofnun og Umhverfisstofnun)
Ef frumvarpið verður samþykkt er gert ráð fyrir að breytingin taki gildi hálfu ári seinna.
