Á auka kjördæmisþing framsóknarmanna í Norðvesturkjördæmi að Reykjum í Hrútafirði í dag var samþykkt tillaga kjörnefndar að framboðslista Framsóknarflokksins í Norðvesturkjördæmi fyrir alþingiskosningar næsta vor.
Gunnar Bragi Sveinsson, þingflokksformaður, mun áfram leiða listann en þá verður Ásmundur Einar Daðason í öðru sæti.
Framsóknarflokkurinn er nú með tvo þingmenn í kjördæminu. Málið er þó dálítið snúið þar sem Guðmundur Steingrímsson, sem var kjörinn fyrir Framsóknarflokkinn vorið 2009, hefur nú gengið úr flokknum en á móti kemur að Ásmundur Einar var kjörinn á þing fyrir Vinstri græna en er nú genginn til liðs við Framsóknarflokkinn.
Samkvæmt nýjasta Þjóðarpúlsi Capacent mælist Framsóknarflokkurinn með um 24% fylgi í kjördæminu, sem myndi gera kjördæmið að hans sterkasta vígi, og þrjá þingmenn.
Framboðslisti Framsóknarmanna í Norðvesturkjördæmi fyrir alþingiskosningar 2013 verður þannig skipaður:
- Gunnar Bragi Sveinsson, alþingismaður, Sauðárkróki
- Ásmundur Einar Daðason, alþingismaður og bóndi, Lambeyrum
- Elsa Lára Arnardóttir, kennari og varabæjarfulltrúi, Akranesi
- Jóhanna M. Sigmundsdóttir, búfræðingur og nemi, Látrum Mjóafirði
- Sigurður Páll Jónsson, útgerðarmaður, Stykkishólmi
- Anna María Elíasdóttir, fulltrúi, Hvammstanga
- Jón Árnason, skipstjóri, Patreksfirði
- Halldór Logi Friðgeirsson, skipstjóri, Drangsnesi
- Jenný Lind Egilsdóttir, snyrtifræðingur og varabæjarfulltrúi , Borgarnesi
- Stefán Vagn Stefánsson, yfirlögregluþjónn og formaður byggðaráðs, Sauðárkróki
- Anna Lísa Hilmarsdóttir, bóndi, Sleggjulæk, Borgarfirði
- Svanlaug Guðnadóttir, hjúkrunarfræðingur, Ísafirði
- Klara Sveinbjörnsdóttir, nemi, Hvannatúni, Borgarfirði
- Magnús Pétursson, bóndi, Miðhúsum A-Húnavatnssýslu
- Gauti Geirsson, nemi, Ísafirði
- Magdalena Sigurðardóttir, húsmóðir og fyrrv. varaþingmaður, Ísafirði
