*

laugardagur, 15. maí 2021
Fólk 21. apríl 2021 09:02

Gunnar nýr fjármálastjóri Póstsins

Gunnar Þór Tómasson hefur hafið störf sem framkvæmdastjóri fjármálasviðs Póstsins en hann kemur frá EY.

Ritstjórn
Gunnar Þór Tómasson
Aðsend mynd

Gunnar Þór Tómasson hefur verið ráðinn í starf framkvæmdastjóra fjármálasviðs Póstsins en hann kemur frá fyrirtækinu EY og hefur þegar hafið störf. Þetta kemur fram í fréttatilkynningu.

Gunnar Þór hefur rúmlega þrettán ára reynslu og þekkingu á sviði reikningshalds, uppgjöra, ársreikningagerðar og endurskoðunar. Hann er löggiltur endurskoðandi og hlaut löggildingu til endurskoðunarstarfa árið 2015 og M.Acc. gráðu frá Háskóla Íslands árið 2010.

„Ég er gríðarlega spenntur að koma til Póstsins. Pósturinn hefur verið á farsælli vegferð síðastliðna mánuði með það fyrir augum að auka þjónustu við viðskiptavini sína með aukinni tæknivæðingu. Starfsumhverfi Póstsins er að nútímavæðast hratt og framtíðin er björt. Hér eru allir að róa í sömu átt og mikill samhugur í starfsmönnum. Ég hlakka mikið til að takast á við þau verkefni sem eru framundan og að aðstoða Póstinn við að ná settum markmiðum,“ er haft eftir Gunnari

„Við erum mjög ánægð að fá eins öflugan einstakling og Gunnar til liðs við okkur hér hjá Póstinum, við fundum strax að hann væri réttur aðili í starfið og vitum að hann á eftir að reynast Póstinum vel í komandi verkefnum. Starf framkvæmdarstjóra fjármálasviðs er fjölbreytt og í mörg horn að líta, það verður gaman að sjá Gunnar setja sinn svip á starfið sem og félagið og við hlökkum mikið til að vinna með honum,“ segir Þórhildur Ólöf Helgadóttir, forstjóri Póstsins.