*

föstudagur, 5. júní 2020
Innlent 28. febrúar 2020 10:57

Hægt að sækja föt á bensínstöðvar

Vörur frá bresku netfataversluninni Asos fást nú afhentar á sjö þjónustustöðvum N1, í sumum tilfellum allan sólarhringinn.

Ritstjórn
Jón Viðar Stefánsson, rekstrarstjóri þjónustustöðva N1 og Hrólfur Andri Tómasson, framkvæmdastjóri Dropp.
Aðsend mynd

N1 hefur hafið afhendingar á vörum frá bresku netversluninni ASOS á sjö þjónustustöðvum félagsins. Viðskiptavinir geta valið á hvaða þjónustustöð N1 varan verður afhent og er þá jafnvel hægt að sækja pakkann hvenær sem er sólarhringsins.

N1 hefur samið við Dropp, en það er nýtt fyrirtæki sem sér um afhendingar á vörum fyrir netverslanir, og TVG Xpress sem sér um sendingar frá ASOS og fleiri netverslunum. Segir fyrirtækið að þessi þjónusta hafi þegar slegið í gegn hjá viðskiptavinum.

Hægt er að fá vörurnar afhentar á þjónustustöðvum N1 á Hringbraut, Ártúnshöfða, Lækjargötu í Hafnarfirði, Háholti, Fossvogi, Borgartúni og Skógarseli.

„Við höfum orðið vör við mikla ánægju með þessa nýjung, bæði á afhendingu á vörum frá ASOS og ekki síður frá ELKO. Nú vinnum við í því að fjölga afhendingarstöðum á landsbyggðinni, en við viljum vanda til verka til að geta boðið nákvæmlega sömu þjónustu um land allt,“ segir Jón Viðar Stefánsson, rekstrarstjóri þjónustöðva N1.

Að sögn Hannesar Alfreðs Hannessonar, forstöðumanns TVG Xpress hefur vöxtur í sendingum frá ASOS verið gífurlegur.

„Frá því að við hófum að þjónustu ASOS árið 2016 hefur umfangið aukist um 300%. Við erum að þjónusta fjölda netverslana en miðað við fjölda sendinga verður að teljast líklegt að þessi breska netverslun sé ein vinsælasta fataverslunin á Íslandi í dag,“ segir Hannes Alfreð.

„Við höfum leitað leiða til að sinna þessum aukna fjölda og með samstarfi við Dropp og N1 teljum við að nú sé komin frábær lausn fyrir viðskiptavini til að nálgast vörurnar.“

Hrólfur Andri Tómasson, framkvæmdastjóri Dropp, segir ljóst að þörf sé á þessari nýju þjónustu.

„Með því að sækja vörurnar á þjónustustöðvar N1 geta viðskiptavinir nálgast sendingar þegar þeim hentar og þurfa ekki að vera heima á ákveðnum tíma til að taka á móti heimsendingu. Flestir íbúar á höfuðborgarsvæðinu keyra framhjá þjónustustöðvum N1 daglega og þurfa því ekki að leggja lykkju á leið sína til að sækja sendingarnar,“ segir Hrólfur.