Kröfur Eflingar eru langt umfram lífskjarasamninginn sem var undirritaður á síðasta ári, að sögn Dags B. Eggertssonar, borgarstjóra. Þá séu kröfurnar sömuleiðis umfram tilboð borgarinnar, sem sé að mati Dags mjög gott og til þess gert að tekjulægstu hóparnir geti á launum sínum lifað mannsæmandi lífi. Dagur greindi frá þessu í Kastljósi á RÚV í gærkvöldi og greinir Vísir frá þessu.

Grunnlaun ófaglærðra starfsmanna myndu hækka úr 310 þúsund krónum á mánuði í 420 þúsund krónur samkvæmt kjarasamningnum sem borgin hefur boðið, segir Dagur. Auk þess fæli boðið í sér 40 þúsund krónur ofan á grunnlaun vegna álagsgreiðslna.

Dagur kveðst hafa reiknað með að samningagerðin myndi ganga hratt og vel fyrir sig, þar sem nýbúið sé að skrifa undir lífskjarasamninginn á almennum vinnumarkaði, sem nái til rúmlega hundrað þúsund launþega, og bæði ríki og sveitarfélög komu að.