Hæstiréttur staðfesti í dag dóm Héraðsdóms Reykjavíkur í máli Róberts Wessman gegn Bjarna Ólafssyni ritstjóra Viðskiptablaðsins.
Héraðsdómur sýknaði Bjarna af kröfu Róberts um ómerkingu ummæla í umfjöllun blaðsins í fyrra og af kröfu Róberts að Bjarni yrði dæmdur til refsingar og til greiðslu miskabóta.
Ummæli snerust um að Róbert hefði verið sakaður um að hafa dregið sér fé frá Actavis Group hf. Bjarni reisti vörn sína á því að ummælin væru rétt enda tilvitnun í stefnu og kæru Björgólfs Thor Björgólfssonar á hendur Róberti.
Í dómi hæstaréttar segir eftirfarandi:
Eins og greinir í héraðsdómi stundar áfrýjandi umfangsmikil viðskipti hérlendis sem erlendis og hefur þátttaka hans í þeim oft hlotið mikla umfjöllun fjölmiðla. Umfjöllun um slík viðskiptamálefni á erindi við almenning og er hluti mikilvægrar þjóðfélagsumræðu. Fallist er á með hinum áfrýjaða dómi að frétt sú í Viðskiptablaðinu, sem um ræðir í málinu, beri glögglega með sér að Björgólfur Thor Björgólfsson telji í stefnu og kæru á hendur áfrýjanda þá tilfærslu fjármuna, sem þar er frá greint, hafa verið ólögmæta og saknæma og að augljóslega sé þar átt við fjárdrátt.
Samkvæmt þessu fólst í hinum umstefndu ummælum í fyrirsögn blaðsins staðhæfing um staðreynd sem var efnislega rétt. Á blaðamanni þeim sem ritaði fréttina hvíldi ekki skylda til að ganga úr skugga um réttmæti þeirrar staðhæfingar sem í ummælunum fólst. Þegar af þessum ástæðum verður niðurstaða hins áfrýjaða dóms staðfest.
Róbert var dæmdur til þess að greiða Bjarna eina milljón króna í málskostnað fyrir hæstarétti. Áður hafði hann verið dæmdur til að greiða 1,5 milljónir í héraði. Samtals þarf hann því að greiða 2,5 milljónir til Bjarna vegna málskostnaðar.
