Samkeppniseftirlitið hefur tilkynnt útgerðarfélaginu Brim að það hefði hætt rannsókn á kaupum félagsins á Fiskvinnslunni Kamba hf. og Grábrók ehf., en jafnframt tilkynnti stofnunin félaginu um að það myndi hefja sjálfstæða rannsókn á mögulegum samruna í andstöðu við samkeppnislög.

Brim sendi frá sér tvær sjálfstæðar tilkynningar vegna málanna í kauphöllinni í gærkvöldi þar sem félagið sagði í annarri að Samkeppniseftirlitið hefði tilkynnt Brim „að það „teldi ekki ástæðu til að aðhafast frekar“ vegna kaupa félagsins á Fiskvinnslunni Kambi hf. og Grábrók ehf. Þar með eru allir fyrirvarar vegna kaupanna fallnir niður og verða þessi viðskipti kláruð samkvæmt samningum þar um.“

Í þeirri síðari sem send var 6 mínútum síðar var svo tilkynnt um að í sömu tilkynningu að ofan til félagsins hefði Samkeppniseftirlitið boðað að það myndi hefja sjálfstæða rannsókn á félaginu vegna viðskipta eigenda þess og tengdra aðila.

Snýst sú rannsókn á því hvort stofnast hafi til yfirráða Útgerðarfélags Reykjavíkur hf, sem er að mestu í eigu fráfarandi forstjóra Brim, Guðmundar Kristjánssonar, og tengdra aðila í Brimi hf, vegna tiltekinna viðskipta á árinu 2019 með eignarhluti í Brim.

Að mati Samkeppniseftirlitsins voru þessi viðskipti til þess fallin að hafa áhrif á mat á yfirráðum í félaginu í skilningi samkeppnislaga. Í þessu máli yrði tekin afstaða til þess hvort að við mögulega myndun yfirráða í Brimi hafi verið framkvæmdur samruni af hálfu aðila í andstöðu við 3. málsgrein 17. greinar a samkeppnislaga eins og segir í tilkynningunni.

Greinin sem um ræðir hljóðar svo í lögunum sem eru frá árinu 2005:

Tilkynna skal Samkeppniseftirlitinu um samruna áður en hann kemur til framkvæmda en eftir að samningur um hann er gerður, tilkynnt er opinberlega um yfirtökuboð eða yfirráða í fyrirtæki er aflað. Samruni sem fellur undir ákvæði laga þessara skal ekki koma til framkvæmda á meðan Samkeppniseftirlitið fjallar um hann.

Eins og Viðskiptablaðið sagði frá á sínum tíma sprengdi Brim kvótaþakið með kaupunum á fyrirtækjunum tveimur á þrjá milljarða , en þau voru keypt af bróður forstjórans . Fiskifréttir sögðu hins vegar frá því Samkeppniseftirlitið hefði ekki gert neinar athugasemdir við kaup Brim, sem þá hét HB Grandi, á Ögurvík árið áður.

Viðskiptablaðið greindi fyrst frá því á sínum tíma þegar Guðmundur keypti ríflega þriðjungs hlut í HB Granda, af Kristjáni Loftssyni í Hval, á genginu 35 fyrir um 22 milljarða króna.

Hér má lesa frekari fréttir um vendingarnar hjá fyrirtækinu síðan þá: