Visa, Mastercard, eBay og Stripe hafa dregið sig út úr samtökum um útgáfu rafeyrisins Libra , sem Facebook setti á laggirnar og hefur verið í forsvari fyrir. Financial Times segir frá .

Ákvörðun fyrirtækjanna fjögurra fylgir á hæla samskonar tilkynningar PayPal í upphafi mánaðar, en auk þeirra er greiðsluþjónustufyrirtækið Mercado Pago hætt við. Aðeins eitt greiðsluþjónustufyrirtæki stendur eftir, hið hollenska PayU.

Hinum fyrirhugaða rafeyri – sem Facebook sér fyrir sér sem alþjóðlegan gjaldmiðil – hefur verið tekið heldur illa af yfirvöldum beggja vegna Atlantshafsins, sem hafa fundið honum allt til foráttu. Áhyggjur þeirra varða meðal annars persónuverndarmál og möguleikann á peningaþvætti.

Forsvarsmenn Facebook og Libra hafa ítrekað mætt fyrir þingnefndir vestanhafs til að svara hinum ýmsu spurningum þingmanna um verkefnið, og í síðasta mánuði var blátt bann lagt við notkun hins nýja rafeyris í Þýskalandi og Frakklandi.

Libra-samtökin, sem telja fjölda stórfyrirtækja auk stofnmeðlimarins, Facebook, þökkuðu hinum fráfarandi fyrirtækjum stuðninginn við markmið verkefnisins.