Icelandair hefur ákveðið að hætta við uppsagnir rúmlega 60 flugmanna og boðið þeim hlutastarf yfir vetrartímann í staðinn. Þeim verður síðan öllum boðið fullt starf í apríl á næsta ári. Fréttablaðið greindi fyrst frá þessu.
Elísabet Helgadóttir, framkævmdastjóri mannauðs hjá Icelandair segir í samtali við Fréttablaðið að þessi lausn hafi verið unnin í samvinnu við Félag íslenskra atvinnuflugmanna.
„Að þessu sinni ákváðum við hins vegar að vinna að öðrum lausnum í samvinnu við Félag íslenskra atvinnuflugmanna (FÍA). Í stað þess að grípa til uppsagna, var ákveðið að minnka starfshlutfall rúmlega 60 flugmanna í 50% yfir vetrartímann, frá 1. október 2019 til 1. apríl 2020, en þá býðst viðkomandi flugmönnum 100% starf á ný. Þessar aðgerðir eru einungis tengdar árstíðasveiflu í rekstrinum og hafa áhrif á um 9% flugmanna hjá félaginu sem er svipað hlutfall og á undanförnum árum,“ segir Elísabet í skriflegu svari til Fréttablaðsins.