*

föstudagur, 7. ágúst 2020
Innlent 15. júní 2020 07:03

Hættan á sóttkví hamlandi fyrir flug

Stjórnarformaður hins nýstofnaða flugfélags Play veltir fyrir sér hvort faraldurinn blossi upp á ný í kjölfar mótmæla.

Höskuldur Marselíusarson
Skúli Skúlason er einn aðaleigenda Airport Associates og leiðir fjárfestahóp sem komið hefur inn í flugfélagið Play sem er í burðarliðnum, og situr hann sem stjórnarformaður beggja félaga.
Aðsend mynd

Mikil umræða hefur verið um það hver eigi að greiða kostnaðinn við skimunina á Keflavíkurflugvelli, en Skúli Skúlason stjórnarformaður Play segist ekki hafa skoðun á því, en hann telur kostnaðinn ekki vera aðalvandamálið sem ferðamenn velti fyrir sér áður en panta ferðir, heldur hættan á að lenda í sóttkví.

Eins og Viðskiptablaðið hefur fjallað um hyggst félagið hefja sig til flugs í október ef þróunin á kórónuveirufaraldrinum verður í jákvæða átt, en stjórnarformaðurinn segir flugvélaleigumarkaðinn það heppilegan að til greina komi að kaupa nýja Airbus vél beint af færibandinu.

„Ég held að það sé hins vegar miklu meira hamlandi að fólk eigi á hættu að lenda í tveggja vikna sóttkví ef það fer í skimun heldur en krónur og aurar. Möguleikinn á að lenda í því er það sem fólk hugsar fyrst út í, áður en það fer að velta fyrir sér hvort það eigi að borga 100 evrur á mann aukalega fyrir ferðina eða hvað það verður,“ segir Skúli.

„Næstu vikur verða líklega prófsteinn á hversu greiðan aðgang veiran eigi að nýsmitum, til dæmis í þessum mótmælum eins og í Bretlandi, Bandaríkjunum og víðar, þar sem fólk hefur algerlega brotið nálgunarviðmið. Ég er auðvitað enginn sérfræðingur í þessu en maður er að reyna að fylgjast með og átta sig á hvernig þetta þróast og það verður áhugavert að sjá hvort það kemur einhver bylgja af þessum Covid smitum núna í kjölfarið.“

Nánar má lesa um málið í Viðskiptablaðinu. Áskrifendur geta nálgast blaðið undir Tölublöð, aðrir geta gerst áskrifendur hér.

Stikkorð: Airbus Play sóttkví Covid 19 Skúli Skúlason