Á árinu 2004 varð hagnaður af reglulegri starfsemi 21.096 fyrirtækja, sem einnig voru í rekstri 2003, 11,7% af tekjum, samanborið við 6,5% árið áður, samkvæmt upplýsingum frá Hagstofu Íslands.
Hagstofan tók saman yfirlit um afkomu atvinnurekstrar á árinu 2004 með samanburði við árið 2003. Yfirlitið nær til ársreikninga 27.653 fyrirtækja, það er lögaðila og einstaklinga í atvinnurekstri, árið 2003 og 27.143 fyrirtækja, árið 2004. Í samantektinni eru 21.096 fyrirtæki þau sömu bæði árin.
Á árinu 2004 varð hagnaður af reglulegri starfsemi allra fyrirtækja í safninu 27.143 að tölu, 11,2% af tekjum, en árið áður var hagnaður af reglulegri starfsemi 27.653 fyrirtækja 6,0% af tekjum.
Í yfirliti þessu eru fyrirtæki í öllum atvinnurekstri, að meðtöldum fyrirtækjarekstri hins opinbera, þ.m.t. fyrirtæki í eigu ríkis og sveitarfélaga, sem rekin eru í hlutafélags- eða samlagsformi og orku-, veitu- og fjölmiðlafyrirtæki, en önnur starfsemi hins opinbera er undanskilin. Starfsemi lífeyrissjóða er einnig undanskilin.
