*

laugardagur, 25. september 2021
Innlent 5. nóvember 2020 16:24

Hagnaður Regins 67 milljónir

Reginn hagnaðist um 1,3 milljörðum króna minna á þriðja ársfjórðungi í ár en í fyrra. 162 milljóna króna hagnaður fyrstu 9 mánuðina.

Ritstjórn
Helgi S. Gunnarsson er forstjóri Regins.
Haraldur Guðjónsson

Reginn skilaði 67 milljón króna hagnaði á þriðja ársfjórðungi ársins sem er lækkun um ríflega 1,3 milljarða frá sama tíma fyrir ári þegar hagnaður félagsins nam rétt tæplega 1,4 milljarði króna. Tekjur félagsins drógust saman um 0,4% milli ára, úr 2.450 milljónum í 2.441 milljón króna, meðan rekstrargjöldin jukust um 14,6%, úr 691 milljón króna í 792 milljónir króna.

Rekstrarhagnaður félagsins fyrir matsbreytingu nam því ríflega 1,6 milljarði króna, sem er lækkun um 6,3% frá árinu áður þegar hann var tæplega 1,8 milljarði króna. Matsbreytingin á tímabilinu í ár var til hækkunar um 109 milljónir króna meðan hækkunin nam tæplega 1,1 milljarði króna fyrir ári.

Í rekstrarhagnaðinn, EBIT, nú bættist hins vegar 133 milljóna króna söluhagnaður fjárfestingareigna, svo hann dróst saman um þrijung, úr ríflega 2,8 milljörðum í tæplega 1,9 milljarða króna.

Eigið fé félagsins dróst saman um 1,9%, úr 46 milljörðum í 45,2 milljarða króna á fyrstu níu mánuðum ársins, meðan skuldirnar jukust um 5,4%, úr 98,6 milljörðum króna í 104 milljarða króna. Þar með jukust eignirnar um 3,1%, úr 144,7 milljörðum króna í 149,1 milljarð á tímabilinu, og eiginfjárhlutfallið lækkaði þar með um 1,5%, úr 31,8% í 30,3%.

Ef horft er til fyrstu níu mánaðanna gildir:

  • Rekstrartekjur námu 7.177 m.kr.
  • Leigutekjur lækka um 1,5% frá fyrra ári.
  • Rekstrarhagnaður fyrir matsbreytingu og afskriftir var 4.689 m.kr. og lækkar um 6,2% frá sama tímabili í fyrra.
  • Bókfært virði fjárfestingareigna, í lok tímabils var 144.286 m.kr. Matsbreyting á tímabilinu var 47 m.kr.
  • Hagnaður eftir tekjuskatt nam 162 m.kr. samanborið við 3.545 m.kr. á sama tímabili í fyrra.
  • Handbært fé frá rekstri á tímabilinu nam 1.695 m.kr. Handbært fé í lok tímabils var 2.854 m.kr.
  • Vaxtaberandi skuldir voru 88.961 m.kr. í lok tímabilsins. samanborið við 84.021 m.kr. í lok árs 2019.
  • Eiginfjárhlutfall er 30,3%.
  • Hagnaður á hlut fyrir tímabilið er 0,09 en var 1,93 fyrir sama tímabil í fyrra.
Stikkorð: Reginn uppgjör