Markaðssetningar- og kynningarfélag Jóns Gunnars Geirdal Ægissonar, Ysland, jók hagnað sinn á síðasta ári í 2,8 milljónir úr 800 þúsund krónum, eða um 245%, þó að tekjurnar hafi dregist saman um 27%, úr 23,2 milljónum í 16,9 milljónir.
Rekstrargjöld félagsins drógust sýnu meira saman, eða 38,5%, úr 20,8 milljónum í 12,8 milljónir, en mestur samdráttur var í kostnaðarverði seldra vara, úr 13 milljónum í 6 milljónir.
Fjármagnsgjöld félagsins drógust nokkuð saman á milli ára, eða úr 1,6 milljón króna í tæplega 1,3 milljónir, eða um 21,4%. Á sama tíma drógust skuldir félagsins saman úr 14,9 milljónum í 12,2 milljónir, eða um 18,3%, en þar sem eigið fé félagsins er neikvætt um nærri 4 milljónir nema eignir félagsins 8,2 milljónum króna. Neikvætt eigið fé félagsins hefur þó dregist saman á milli ára úr tæplega 6,9 milljónum árið 2017.
Jón Gunnar hefur komið að stofnun Lemon, BlackBox og fleiri félaga.
