Hagnaður Glitnis [ GLB ] á fjórða fjórðungi minnkar um 70% milli ára en hagnaður fjórðungsins nam 2,5 milljörðum króna.
Kostnaðar hlutfallið fer í 79% á fjórða fjórðungi ársins úr 40% á sama tíma fyrir ári, líkt og sjá má á töflunni hér til hliðar.
Hreinar vaxtatekjur aukast um 55% milli ára í 11,9 milljarða króna.
Eignir í stýringu drógust saman um 6,7% frá fyrri ársfjórðungi, vegna sölu hlutar bankans í Glitnir Property Holding, en heildarvöxtur yfir árið nam 91% og eru nú 936 milljarðar króna.
"Þegar ég lít yfir afkomutölurnar er ánægjulegt að sjá svo góðan vöxt í hreinum vaxta- og þóknanatekjum eins og raun ber vitni," segir Lárus Welding, forstjóri Glitnis, í fréttatilkynningu. "Þóknanatekjur bankans voru stöðugar á árinu og námu samtals um 37,6 milljörðum króna, sem er um 42% aukning frá árinu áður. Ég er einnig ánægður að sjá tekjur af kjarnastarfsemi bankans vaxa á nýjan leik þar sem vöxturinn nam um 21% á ársgrundvelli auk þess sem traust útlánasafn bankans tryggir okkur góðar vaxtatekjur á þessu ári."
"Markaðssyllur Glitnis, sjávaraútvegur, jarðhiti og þjónustuskip við olíuiðnaðinn hafa vaxið sem hluti af lánabók bankans, eða úr 11% árið2006 í 13% 2007. Með því að byggja upp sérþekkingu á þessum þremur sviðum erum við í raun að fjárfesta í framtíðarvexti bankans. Þá hefur Glitnir einnig skipað sér í fremstu röð á sviði hlutabréfamiðlunar á Norðurlöndunum."
"Á árinu 2007 hefur Glitnir fjárfest í ytri og innri vexti og endurspeglast sá vöxtur m.a. í auknum kostnaði í tengslum við samþættingarverkefni, opnun nýrra starfsstöðva auk kostnaðar sem féll til vegna stjórnendaskipta. Við höfum hinsvegar nú gert skipulagsbreytingar sem miða að því að auka hagkvæmni og kostnaðaraðhald og gera rekstarábyrgð, ákvarðanatöku og boðleiðir skýrari undir forystu stjórnenda á hverju markaðssvæði fyrir sig.""Markaðsaðstæður síðustu mánaða hafa verið öllum fjármálafyrirtækjum erfiðar. Glitnir er hins vegar í góðri stöðu til að takast á við núverandi aðstæður með yfir 6 milljarða evra í lausafé og sterkan undirliggjandi tekjugrunn. Lánasafnið okkar er áhættudreift og byggt á traustum og góðum eignum."
"Ég er þess fullviss að þessar áherslur í stefnu Glitnis skapa okkur nauðsynlegar undirstöður fyrir frekari vöxt á öllum afkomusviðum bankans", segir Lárus.