Rekstrarhagnaður (EBITDA) Kögunarsamstæðunnar nam 646 mkr. á árinu 2004 samanborið við rúmlega 238 mkr. árið áður og er þetta hækkun um 171%. Hagnaður samstæðunnar fyrir skatta var 533 mkr. en var 375 mkr. árið 2003 og er þetta hækkun um 158 mkr. eða 42%. Hagnaður ársins eftir skatta varð 453 mkr. en var 337 mkr. á árinu 2003 sem er hækkun um 34%. Hagnaður á hverja krónu hlutafjár nam 3,45 kr. Öll félög innan Kögunarsamstæðunnar skiluðu hagnaði á árinu.

Rekstrartekjur samstæðu Kögunar hf. námu samtals 4.943 mkr. á á árinu 2004. Veltuaukning er 3.698 mkr. eða 297% milli ára en hafa ber í huga að fleiri fyrirtæki mynda nú samstæðu Kögunar en áður. Rekstrarhagnaður (EBITDA) nam 646 mkr. eða 13,1%. Húsnæðisbreytingar að fjárhæð um 40 mkr. voru gjaldfærður á tímabilinu í samræmi við reiknings­skilahefðir Kögunar. Hefðu framkvæmdirnar verið eignfærðar og afskrifaðar á lengri tíma, væri EBITDA 686 mkr. eða 13,9%.

Áætlun Kögunar hf. fyrir árið 2004 gerði ráð fyrir veltu að fjárhæð 3.000 mkr. 3.200 mkr. og að 15% EBITDA næðist innan tveggja ára, þ.e. fyrir árslok 2005. Velta Kögunar á árinu án hlutdeildar í Opin Kerfi Group hf. varð hins vegar 3.400 mkr. og EBITDA 518 mkr. sem er 15,3%.

Afskriftir námu 74 mkr. en tekið skal fram að gerðar voru sérstakar einsskiptis afskriftir hjá Skýrr hf til samræmingar á reikningsskilaaðferðum sem koma að hluta inn í samstæðuuppgjörið.

Hagnaður fyrir fjármagnsliði nemur samtals 572 mkr. en var 210 mkr. árið 2003. Hagnaður fyrir fjármagnsliði hækkar þannig um 362 mkr. eða 172% á milli ára.

Fjármagnsgjöld umfram fjármunatekjur voru um 39 mkr. Vaxtatekjur námu 129 mkr. og hlutdeild í afkomu hlutdeildarfélaga nam 64 mkr. Þar er um að ræða hlutdeildartekjur Kögunar hf. í Opin Kerfi Group hf. frá 17. ágúst til 30. nóvember sl. en félagið kom að fullu inn í samstæðu Kögunar þann 1. desember. Hagnaður af sölu hlutabréfa er samtals 85 mkr. Seldur var 10% hlutur í Þekkingu hf., 33% hlutur í Landsteinum Nederland BV í Hollandi og 100% hlutur í Alpha Landsteinar Ltd. í Bretlandi. Niðurfærsla á eignarhlutum í félögum var 6 mkr. Vaxtagjöld námu 310 mkr. og vega þar þyngst vextir og verðbætur af skuldabréfalánum sem boðin voru út á árinu í tengslum við kaup Kögunar á Hug hf. og Opin Kerfi Group hf.

Hagnaður samstæðunnar fyrir tekjuskatt var samtals 533 mkr. en var 375 mkr. á árinu 2003.

Reiknaður tekjuskattur er samtals 80 mkr. en var 38 mkr. á árinu 2003. Í ársreikningnum er eign­færð tekjuskattsinneign að fjárhæð 287 mkr. vegna ójafnaðs skattalegs taps dótturfélaga Kögunar, að frádreginni sérstakri varúðarniðurfærslu.

Hagnaður samstæðunnar eftir tekjuskatt árið 2004 er því samtals 453 mkr. Hagnaðaraukning milli ára nemur 116 mkr. eða 34% og er hér um mesta hagnað félagsins að ræða frá stofnun þess árið 1988. Hagnaður ársins á hverja krónu hlutafjár er 3,45 kr.

Miklar breytingar hafa orðið á efnahagsreikningi samstæðunnar frá uppgjöri ársins 2003 vegna kaupa á Opin Kerfi Group hf. Heildareignir Kögunar hf. hinn 31. desember 2004 námu 16.710 mkr. Á sama tíma námu heildarskuldir samstæðunnar 11.482 mkr.

Eigið fé Kögunar hf. í lok desember 2004 er 5.228 mkr. en var 1.765 mkr. í lok árs 2003. Frá ársbyrjun 2004 var gerð sú breyting á reikningsskilaaðferðum félagsins að viðskipta­vild var ekki lengur afskrifuð línulega á tilteknum árafjölda heldur var framkvæmt virðisrýrnunarpróf til að meta verðmæti viðskiptavildarinnar og er þetta gert í samræmi við alþjóðlega reikningsskilastaðla. Virðisrýrnunarpróf leiddi í ljós að ekki væri ástæða til að færa niður viðskiptavild félagsins.

Veltufé frá rekstri árið 2004 er 453 mkr. en var 194 mkr. árið 2003 og er það hækkun um 259 mkr. eða 133%. Handbært fé frá rekstri er 258 mkr. en var 143 mkr. árið 2003 og er það hækkun um 115 mkr. eða 80%. Fjárfestingarhreyfingar nema 8.045 mkr. á árinu en voru 593 mkr. árið 2003. Munar hér mestu um kaup Kögunar á Opin Kerfi Group hf. að fjárhæð 8.017 mkr. Fjármögnunarhreyfingar eru samtals 7.979 mkr., þar af er lántaka að fjárhæð 5.250 mkr. og innborgað hlutafé að fjárhæð 3.121 mkr. til að fjármagna kaup Kögunar hf. á Opin Kerfi Group hf. og Hug hf. Fjármögnunarhreyfingar árið 2003 voru 442 mkr.

Veltufjárhlutfall er 1,2, eiginfjárhlutfall er 32%, innra virði hlutafjár er 27,5 og arðsemi eigin fjár á ársgrundvelli er 26%.

Árið 2004 hefur verið mikill umbreytingatími hjá Kögun hf. en í árslok 2003 keypti félagið Hug hf. og Landsteina Streng hf. Félögin eru, eins og þau dótturfélög sem Kögun á fyrir, rekin sem sjálfstæðar einingar innan Kögunarsamstæðunnar. Þá voru kaupin í samræmi við yfirlýsta stefnu Kögunar hf. um að stækka rekstur sinn á sviði hugbúnaðar og upplýsingatækni. Stjórnendur Kögunar hafa varið miklum tíma á árinu í hagræðingar­aðgerðir og endurskipulagningu dótturfélaganna og skiluðu þau öll hagnaði á árinu. Þá var vöru- og þjónustuframboð einstakra félaga endurskoðað m.t.t. hagræðingar og markvissari þjónustu við viðskiptavini.

Fjármögnun dótturfélaganna var enduskipulögð á árinu og óhagstæð lán greidd upp með hagstæðari lánum.

Á árinu var fjárstýring, bókhald, innheimta og launa- og bakvinnsla félaganna sameinuð á einum stað á aðalskrifstofu Kögunar að Lynghálsi 9.

Í ágúst 2004 keypti Kögun hf. 35,77% hlutafjár í Opin Kerfi Group hf. (OKG). Hlutabréfin voru greidd með reiðufé, og fjármögnuð með útgáfu hlutabréfa í Kögun hf. og með lántöku. Í október festi Kögun hf. síðan kaup á 32,93% hlut í OKG til viðbótar á genginu 26,8. Greitt var fyrir hlutina til helminga með reiðufé og hlutabréfum í Kögun hf á genginu 42,8. Í kjölfarið var öðrum hluthöfum OKG hf gert tilboð í bréf þeirra á sömu kjörum.

Kaupin voru greidd með lántöku og útgáfu nýrra hluta í Kögun hf. en þann 12. nóvember sl. samþykkti hluthafafundur heimild til handa stjórn Kögunar að gefa út hlutafé að fjárhæð 60,0 mkr. að nafnvirði vegna ofangreindra kaupa. Heildarhlutafé nam 193 m.kr í árslok. Í kjölfar kaupa Kögunar á OKG var félagið afskráð úr Kauphöll Íslands hf.