Hagnaður af kjarnastarfsemi Landic Property nam 5.362 milljónum kr. á fyrstu sex mánuðum ársins en rekstrartekjur tímabilsins voru 16.755 milljónir kr.
Þetta kemur fram í afkomutilkynningu frá Landic Property.
Hagnaður tímabilsins nam 435 milljónum króna samanborið við hagnað 4,3 milljarða á sama tíma í fyrra.
Heildareignir félagsins í lok júní námu 592.008 milljónum króna en eigið fé félagsins ásamt tekjuskattskuldbindingum og víkjandi lánum var samtals 117.324 milljónir kr., sem er 20% af heildareignum í lok júní 2008.
Tekst að standa vörð um verðmæti félagsins
Skarphéðinn Berg Steinarsson, forstjóri Landic Property segir í tilkynningunni að rekstu á kjarnastarfsemi félagsins gengur vel „eins og glögglega kemur fram í afkomu félagsins.“
„Við höfum auðvitað orðið vör við umhverfið í fjármálaheiminum eins og öll félög með alþjóðlega starfsemi. En okkur hefur tekist að standa vörð um verðmæti félagsins og náð árangri í þessu umróti,“ segir Skarphéðinn.
„Efnahagsreikningurinn endurspeglar vel stærð og umsvif Landic Property, bæði á íslenskum og alþjóðlegum mælikvarð. Í reikningnum kemur fram að mál Keops Development hefur verið erfið og það var slæmt að salan á félaginu gengi ekki eftir. En við erum að fara í saumana á rekstri Keops Development með það að markmiði að hámarka þá stöðu sem býr í félaginu.”