Jaðaráhrif skattkerfisins geta valdið því að fólk auki ráðstöfunartekjur sínar aðeins um 3.000 krónur við að selja út vinnu sína fyrir 10 þúsund krónur.
70% fara í skatta og skerðingar
„Hinar 7.000 krónurnar fara í virðisaukaskatt, tryggingagjald, iðgjöld í sameignarsjóð, tekjuskatt og bótaskerðingu.
Þetta óæskilega samspil skatta- og bótakerfa hefur stundum verið nefnt jaðaráhrif.
Ég hef sett upp reiknivélina Vasareikninn á heimasíðu minni www.sigridur.is/vasareiknir þar sem menn geta reiknað dæmið út frá sínum forsendum,“ segir Sigríður Andersen alþingismaður.
Getur jafnvel litið enn verr út
Bendir hún á að þættir eins og hjúskaparstaða, tekjur, eignir, skuldir, vaxtagjöld og fjölskyldustærð hafi áhrif á þessa hluti.
„Auk þess sem hér er tekið með í reikninginn eru afborganir námslána tekjutengdar, svo dæmið getur litið jafnvel enn verr út.“
Réttindi hjóna skert á síðasta kjörtímabili
Sigríður bendir jafnframt á að réttindi sambúðarfólks og hjóna urðu ekki lengur að fullu millifæranleg í skattkerfinu eftir breytingar á síðasta kjörtímabili.
Geti tekjuskattur því verið mjög misjafn eftir því hvernig tekjur skiptist á milli hjóna.
Getur munað allt að 700 þúsund
„Það getur munað yfir 700 þúsund krónum í tekjuskatt. Þetta atriði stendur til bóta um næstu áramót með lagabreytingum sem ég barðist fyrir á þingi síðastliðinn vetur.
Þá mun miðþrep tekjuskattsins einnig falla niður sem dregur úr jaðaráhrifum á því bili.
Skatthlutföll hafa sömuleiðis verið að lækka undanfarin ár, bæði virðisaukaskatturinn, tryggingagjaldið og tekjuskattshlutföllin.
En betur má ef duga skal,“ segir Sigríður.