Halli á viðskiptajöfnuði var 10,1 milljarðar króna á fyrsta ársfjórðungi þessa árs sem er um 21,7 milljarða króna betri niðurstaða en á sama tímabili í fyrri.
Niðurstaðan er einnig 12,9 milljörðum betri en á ársfjórðungnum á undan. Halli á vöruskiptajöfnuði var 45,7 milljarðar króna og 21,4 milljarða afgangur á þjónustujöfnuði.
Frumþáttatekjur skiluðu 26,1 milljarða króna afgangi en rekstrarframlög 12 milljarðar króna halla, samkvæmt nýbirtum upplýsingum frá Seðlabanka Íslands sem sýna bráðabirgðayfirlit yfir greiðslujöfnuð við útlönd á fyrsta á fyrsta ársfjórðungi 2023 og erlenda stöðu þjóðarbúsins í lok ársfjórðungsins.
Betri niðurstaða viðskiptajafnaðar miðað við sama ársfjórðung árið 2022 skýrist af hagstæðari niðurstöðu frumþáttatekna sem nemur 35,2 milljörðum króna.
„Að mestu leyti skýrist það af lakari afkomu fyrirtækja í erlendri eigu sem flokkast undir beina fjárfestingu. Einnig var aukinn afgangur af þjónustuviðskiptum sem nemur 15,6 ma.kr. Á móti vegur meiri halli af vöruviðskiptum sem nemur 26,5 ma.kr og af rekstrarframlögum sem nemur 2,6 ma.kr,“ segir í tilkynningu Seðlabankans.
Í lok ársfjórðungsins var hrein staða við útlönd jákvæð um 1.022 milljarðar króna eða 26,3% af vergri landsframleiðslu (VLF) og batnaði um 50 milljarða eða 1,3% af VLF á fjórðungnum.
Erlendar eignir þjóðarbúsins námu 5.120 milljörðum í lok ársfjórðungsins en skuldir 4.098 milljörðum.
„Á fjórðungnum versnaði staðan um 29 ma.kr. vegna fjármagnsviðskipta en erlendar eignir hækkuðu um 89 ma.kr. og skuldir um 118 ma.kr. Gengis- og verðbreytingar lækkuðu virði eigna á ársfjórðungnum um 9 ma.kr. og skulda um 92 ma.kr. og leiddu því til 83 ma.kr. betri hreinnar erlendrar stöðu.“
„Gengi krónunnar hækkaði um 3,1% miðað við gengisskráningarvog. Verð á erlendum verðbréfamörkuðum hækkaði um 7% milli fjórðunga og verð á bréfum á innlendum hlutabréfamarkaði um 7,3%,“ segir í tilkynningu SÍ.