Greiðsluuppgjör ríkissjóðs fyrir janúar til febrúar 2015 hefur verið birt á vef fjármálaráðuneytisins.
Þar kemur fram að handbært fé frá rekstri hafi versnað verulega á milli ára, en það var neikvætt um tæpa 48,2 milljarða króna samanborið við jákvætt handbært fé upp á 5,3 milljarða króna í fyrra.
Segir í frétt á vef ráðuneytisins að þetta skýrist að stærstum hluta með útgreiðslum vegna þess sem þar er kallað leiðrétting verðtryggðra húsnæðislána sem gjaldfærðar voru í lok árs 2014 en komu til greiðslu í janúar.
Innheimtar tekjur lækkuðu um rúma þrjá milljarða króna á milli ára og námu nú tæpum 102 milljörðum króna. Þá jukust greidd gjöld um 14,8 milljarða króna milli ára og námu þau nú tæpum 114 milljörðum króna.
