Ný stefna Bandalags háskólamanna, BHM, var samþykkt á aðalfundi félagsins í síðustu viku. Stefnan nær til menntamála, launamála, jafnréttismála, lífeyrismála og málefna stúdenta og LÍN. Í stefnunni er mikil áhersla lögð á samkeppnishæfni þjóðarinnar.
Guðlaug Kristjánsdóttir, formaður BHM, fjallaði meðal annars um skýrslu McKinsey um hagsæld í ávarpi sínu á aðalfundinum. Hún sagði Ísland eiga langt í land í alþjóðlegum samanburði hvað varðar áætlanagerð og langtímastefnumótun.
„Í mínum huga er ekki vafi á því að forsendur fyrir bættum kjörum og réttindum á vinnumarkaði er blómlegt atvinnulíf sem horfir til framtíðar. Hagsæld á vinnumarkaði byggir á sterku menntastigi og góðri nýtingu þekkingar á öllum sviðum,“ sagði hún undir lok ræðunnar.