*

laugardagur, 31. júlí 2021
Innlent 23. október 2014 16:22

HB Grandi í söluviðræðum á eignarhlut í Stofnfiski

Eignarhlutur HB Granda í Stofnfiski nemur 64,94% af hlutafé félagsins. Bókfært verð hlutarins er 7,1 milljón evra.

Ritstjórn
Vilhjálmur Vilhjálmsson, forstjóri HB Granda.
Haraldur Guðjónsson

HB Grandi hefur ákveðið að ganga til viðræðna við ákveðinn fjárfesti um hugsanlega sölu á eignarhluta félagsins í Stofnfiski hf. Þetta kemur fram í tilkynningu frá félaginu.

Stofnfiskur hf. er stærsti framleiðandi á Íslandi á laxahrognum og er fyrirtækið auk þess leiðandi í kynbótarannsóknum fyrir fiskeldi.

Eignarhlutur HB Granda hf. í Stofnfiski hf. nemur 64,94% af hlutafé félagsins og var bókfært verð eignarhlutarins, samkvæmt ársreikningi HB Granda vegna ársins 2013, skráð 7,1 milljónir evra í árslok 2013.

Félagið segir ekki hægt að áætla á þessum tímapunkti hversu lengi viðræður munu standa yfir en viðræðurnar eru bundnar nokkrum skilyrðum og fyrirvörum. Félagið mun veita frekari upplýsingar eftir því sem viðræðum vindur fram.

Stikkorð: HB Grandi Stofnfiskur