Ástralska flugfélagið Qantas mun fyrir lok þessa árs hefja tilraunaflug frá Sydney til London og New York en flugtíminn milli staðanna er 19 klukkustundir og yrði því um lengsta farþegaflug í heimi að ræða. Lengsta farþegaflug í heimi í dag er á milli Singapúr og New York og er flugtíminn að meðaltalui 18 klukkustundir og 25 mínútur. Þetta kemur fram í frétt BBC .

Markmiðið með tilraunafluginu er að leggja mat á hvort farþegar og áhafnarmeðlimir geti staðist maraþonflugin. Prófanirnar munu fara þannig fram að allt að 40 farþegar verða um borð í vélum félagsins og munu verða gerðar athuganir á heilsu þeirra meðan á fluginu stendur. Farþegarnir um borð munu samanstanda af starfsmönnum Qantas. Fylgst verður með svefnmynstri farþega og áhafna og matar- og drykkjarneyslu þeirra til leggja mat áhrif flugsins á heilsu og líkamsklukku.

Alan Joyce, forstjóri Qantas hefur sagt að bein flug frá austurströnd Ástralíu til New York og London séu lokatakmarkið í flugi. Hann hefur þó sagt að á sama tíma veki lengd flugsins skynsamar spurningar um þægindi og vellíðan farþega.

Qantas mun notast við Boeing 787 vélar á flugleiðunum og mun ákvörðun verða tekin fyrir lok árs hvort flugleiðirnar komi inn í leiðakerfi félagsins.