Icelandair greindi aðfaranótt miðvikudags frá því að félagið gerði ekki ráð fyrir Boeing 737 MAX vélum félagsins yfir háönn sumarsins en áður hafði verið gert ráð fyrir þeim í maí. Tilkynningin kom í kjölfar þess að Boeing hafði nokkrum klukkutímum áður greint frá því að aflétting á kyrrsetningu vélanna myndi dragast að minnsta kosti fram á mitt sumar, þremur mánuðum seinna en áður hafði verið gert ráð fyrir.

Þegar MAX vélarnar voru kyrrsettar í mars á síðasta ári hafði Icelandair þegar fengið 6 af þeim 16 vélum sem áætlað var að kæmu inn í flota félagsins til ársins 2021. Félagið átti svo að fá þrjár vélar til viðbótar í maí á síðasta ári auk þess sem fimm áttu að bætast við á þessu ári. Það er því ljóst að Icelandair mun verða án samtals 14 véla sem upprunalega var gert ráð fyrir.

Icelandair var fyrst allra flugfélaga í heiminum til að greina frá aðgerðum vegna tilkynningar Boeing. Spurður hvort Icelandair hafi verið með aðra áætlun tilbúna ef kyrrsetning vélanna myndi dragast enn frekar á langinn, segir Bogi Nils Bogason, forstjóri Icelandair Group, að svo hafi verið.

Eins og kemur fram í tilkynningunni þá vorum við búin að undirbúa okkur undir að kyrrsetningin gæti dregist á langinn. Við vorum búin að draga úr áhættunni í leiðakerfinu með uppstillingu á háönninni og með því að leigja inn vélar, þannig að við vorum með varaáætlun tilbúna. Samt sem áður vorum við fram á gærdaginn að gera ráð fyrir að vélarnar færu í loftið í maí.“

Skýrist á fyrri helmingi ársins

Í uppgjöri Icelandair fyrir fyrsta ársfjórðung síðasta árs kom fram að hafin væri endurskoðun á langtíma flotastefnu félagsins. Að sögn Boga hefur tilkynningin í gær engin áhrif á þá vinnu. „Það liggur ekki fyrir hvenær sú vinna klárast en stefnum á að koma með niðurstöður á fyrri helmingi þessa árs.

Spurður hvort Icelandair hafi enn trú á MAX vélunum eftir allt sem á undan er gengið segir Bogi að svo sé.

„Við höfum fulla trú á vélunum. Það er mjög vandað og yfirgripsmikið ferli í gangi þótt það hafi ýmislegt komið upp á. Við höfum hins vegar fulla trú á því að vélarnar fari að fljúga í okkar leiðakerfi þegar líða fer á árið.“

Nánar er rætt við Boga í Viðskiptablaðinu. Áskrifendur geta nálgast blaðið undir Tölublöð , aðrir geta skráð sig í áskrift hér .