Heildarhlutafé 365 miðla hefur verið aukið úr 2,1 í 2,6 milljarða, eða um hálfan milljarð. Aukningin er öll í A-hlutum. Þetta kemur fram í Morgunblaðinu í dag.
Áður var B-hlutafé lækkað um 187 milljónir og við það fór heildarhlutaféð niður í 2,1 milljarð. Í samtali við Morgunblaðið segir Sævar Freyr Þráinsson, forstjóri 365 miðla, hlutafjáraukningu í félaginu gera það kleift að létta á skuldum og styrkja rekstur.
Sævar Freyr staðfesti að Sigurður Bollason fjárfestir væri nýr hluthafi í 365 miðlum í gegnum félagið Grandier S.A. í Lúxemborg. Hann eigi A-hluti fyrir 200 milljónir, eða 8,74% A-hluta í félaginu.
Stjórn 365 miðla ákvað í desember að lækka B-flokk hlutafjár. Félag í eigu Ingibjargar Stefaníu Pálmadóttur, á alla B-hluti félagsins. Lækkunin nam 230 milljónum króna. Þar af voru 187,2 milljónir lækkun á nafnverði B-flokks hlutafjár úr 445,1 milljón í 257,9 milljónir og heildarhlutafé fór úr 2,3 milljörðum í 2,1 milljarð. Kom lækkunin fram sem greiðsla til félags í eigu Ingibjargar.