*

föstudagur, 14. ágúst 2020
Innlent 17. janúar 2020 11:10

Heimavellir seldu 112 íbúðir

Í árslok 2019 átti leigufélagið 1.627 íbúðir en félagið hyggst selja 400 íbúðir fyrir um 15 milljarða.

Ritstjórn
Fjöldi íbúða rís ný við Hlíðarenda í Reykjavík en á móti þeim íbúðum sem Heimavellir seldu undir lok síðasta árs fékk það 19 íbúðir á svæðinu afhentar.
Haraldur Guðjónsson

Leigufélagið Heimavellir seldu 112 íbúðir víðs vegar um landið á fjórða ársfjórðungi síðasta árs og er það í samræmi við áætlun um endurskipulagningu eignasafns félagsins að því er fram kemur í tilkynningu.

Á sama tíma tók félagið við 19 íbúðum til viðbótar á við Hlíðarenda í Reykjavík. Samtals keypti félagið 106 íbúðir á síðasta ári, en seldi 370 íbúðir.

Nam söluverð þeirra 11,5 milljörðum króna, en 5,3% munaði á söluverði og bókfærðu virði íbúðanna sem voru tæplega 35,6 þúsund fermetrar að stærð.

Áætlun félagsins gerir ráð fyrir sölu ríflega 400 íbúða að andvirði 14,5 til 15,5 milljarða króna á árunum 2019 til 2021. Við árslok átti félagið 1.627 leiguíbúðir.