*

laugardagur, 8. ágúst 2020
Innlent 4. júní 2020 09:45

Heimila samstarf rútufyrirtækja

Samkeppniseftirlitið hefur heimilað samstarf rútufyrirtækja. Samstarfið er bundið ýmsum skilyrðum.

Ritstjórn
Páll Gunnar Pálsson er forstjóri Samkeppniseftirlitsins.
Þröstur Njálsson

Samkeppniseftirlitið heimilaði síðastliðinn föstudag samstarf hópbifreiðafyrirtækjanna Kynnisferða og Airport Direct. Samstarfið miðar að tímabundinni samnýtingu á bifreiðaflota fyrirtækjanna á áætlunarleiðinni á milli Flugstöðvar Leifs Eiríkssonar og höfuðborgarsvæðisins. Frá þessu greinir Samkeppniseftirlitið.

Er undanþágunni ætlað að gera fyrirtækjunum kleift að bregðast við því fordæmalausa ástandi sem stafar af heimsfaraldri af völdum COVID-19. Samstarfið skal einungis felast í því að samnýta ferðir hópferðabifreiða fyrirtækjanna á áætlunarleiðinni á undanþágutímabilinu.

Á meðal þeirra skilyrða sem samstarfið er bundið má nefna að öll samskipti á milli fyrirtækjanna skulu vera afmörkuð við markmið samstarfsins. Ferðamálastofa skal gefinn kostur á að vera þátttakandi í öllum samskiptum sem lúta að samstarfinu, tilgangur þess er að tryggja að Ferðamálastofa geti öðlast yfirsýn yfir þær aðgerðir sem keppinautar á markaðnum grípa til að þessu leyti.

Enn fremur skal þess gætt að ekki komi til samræmingar á verði samstarfsaðila með nokkrum hætti. Þá er það jafnframt forsenda samstarfsins að samstarfsaðilar sinni sjálfir eigin markaðsmálum og selji áfram ferðir á áætlunarleiðinni með sjálfstæðum hætti, það er að segja, eftir eigin söluleiðum.

Við veitingu undanþágu í máli þessu hafði það sérstaka þýðingu að á Kynnisferðum og Airport Direct hvílir skylda, á grundvelli samningsskuldbindinga við Isavia, til að hafa áætlunarferðir til og frá flugstöðinni starfræktar í tengslum við allar komur og brottfarir áætlunar- og leiguflugvéla á Keflavíkurflugvelli.