*

sunnudagur, 25. júlí 2021
Fólk 20. janúar 2021 12:56

Helga Dís og Pétur til Samkaupa

Samkaup ráða tvo stjórnendur, þau Helgu Dís Jakobsdóttir yfir þjónustu og upplifun og Pétur Karl Ingólfsson yfir upplýsingatækni.

Ritstjórn
Helga Dís Jakobsdóttir og Pétur Karlsson hefja störf hjá Samkaupum um mánaðarmótin.
Aðsend mynd

Helga Dís Jakobsdóttir og Pétur Karl Ingólfsson hafa verið ráðin til Samkaupa til að stýra þjónustu og upplifun annars vegar og upplýsingatækni hins vegar, en þau hefja störf þann 1. febrúar næstkomandi. 

Helga Dís Jakobsdóttir hefur verið ráðin í stöðu þjónustu- og upplifunarstjóra Nettó, en hún hefur starfað við rekstur og bókhald Hjá höllu síðustu þrjú árin en þar áður í tíu ár hjá Bláa lóninu, fyrst sem þjónn en seinni árin í fjármáladeild.

Helga Dís útskrifaðist með BS-gráðu í viðskiptafræði með áherslu á stjórnun og forystu frá Háskóla Íslands. Einnig hefur hún lokið MS-gráðu í þjónustustjórnun frá viðskiptafræðideild Háskóla Íslands. 

Pétur Karl Ingólfsson tekur við stöðu upplýsingatæknistjóra Samkaupa, en í fréttatilkynningu um ráðninguna er hann sagður reynslumikill og að hann hafi meðal annars starfað sem verkefnastjóri á sviði stafrænna vara og stefnumótunar hjá Icelandair. Pétur hefur einnig starfað við hugbúnaðarþróun og rekstur hjá Isavia/Duty Free og vefþróun hjá 365 miðlum.

„Það er afar ánægjulegt að fá svona reynslumikið og hæfileikaríkt fólk í hópinn okkar og við bjóðum þau hjartanlega velkomin,“ segir Gunnur Líf Gunnarsdóttir, framkvæmdarstjóri mannauðssviðs Samkaupa.  

Samkaup leggur áherslu á að vera eftirsóttur vinnustaður, með öfluga framlínu þar sem gildi fyrirtækisins, Kaupmennska – Áræðni, Samvinna og Sveigjanleiki sem er leiðarljós í öllu starfi félagsins. Hjá Samkaupum starfa um 1300 manns í tæplega 700 stöðugildum.

Samkaup reka um 60 verslanir víðsvegar um landið. Þær spanna allt frá lágvöruverðsverslunum til þægindaverslana. Helstu verslanamerki Samkaupa eru Nettó, Kjörbúðin, Krambúðin og Iceland.