Hvers vegna að bíða fram á sumar með skemmtileg helgarplön þegar alls konar stuð er í boði núna strax úti um allar trissur? Farðu upp í sumarbústað og ekki gleyma spilastokknum. Þú þarft ekki að eiga bústað til að geta sagst vera á leið „upp í bústað”. Á Bungalo.is (jájá, þetta heitir þetta bara) er hægt að leigja allar tegundir af sumarhúsum. Pakkaðu niður persónulegum munum eins og fjölskyldumyndum og vel völdum húsgögnum. Ruslaðu þessu upp þegar í bústaðinn er komið svo facebookinstagram- tvitter samfélagið haldi að þú eigir kofann.
Bíltúrar eru vanmetin skemmtun. Fyrir áhugafólk um akstur, ís, fasteignir og mannfræði er engu líkt að rúnta um ókunnuga bæi, stoppa í sjoppu staðarins, fá sér hressingu og segjast vera úr Reykjavík eða höfuðborginni og spyrja fólk hvort það hafi komið þangað og hvort það viti hvað Kringlan er. Hvernig væri að keyra um Suðurnesin og skoða hús og garðálfa? Það má líka alltaf rúnta upp í Borgarnes, klæða alla fjölskylduna í búninga eftir sögupersónum úr Íslendingasögunum og skylmast með trésverðum á bílaplaninu fyrir utan sundlaugina.
Nánar er fjallað um málið í Viðskiptablaðinu. Áskrifendur geta nálgast blaðið undir liðnum tölublöð hér .
