Alþjóðahagkerfið gæti verið að sigla inn í alvarlegri fjármálakreppu heldur en flestir hafa fram til þess reiknað með. Það er auk þess raunverulegur möguleiki á því að stærstu hagkerfi heimsins muni í kjölfarið ganga í gegnum verðhjöðnunarskeið.
Þetta er á meðal þess sem kemur fram í ársskýrslu Alþjóðagreiðslubankans (e. BIS - Bank for International Settlements) sem birtist fyrr í dag.
Þetta er ekki í fyrsta skipti sem Alþjóðagreiðslubankinn hefur sent frá sér slík varnarorð. Fyrir aðeins ári síðan kom bankinn fjármálamörkuðum í opna skjöldu þegar hann varaði við því að við gætum brátt staðið frammi fyrir sambærilegu ástandi og við upphaf kreppunnar miklu í Bandaríkjunum.
Þetta hefur því miður reynst óþægilega nákvæmur spádómur.
Alþjóðagreiðslubankinn er heldur ekki hvaða stofnun sem er – heldur sjálfur seðlabanki seðlabankanna. Sú svartsýna mynd sem bankinn dregur upp af ástandinu á fjármálamörkuðum vekur því óhjákvæmilega meiri athygli en ella.
Í skýrslunni varar bankinn við því að undirmálslánakrísan vestanhafs hafi endurspeglað vaxandi skuldsetningu – bæði heimila og fyrirtækja – ríkustu þjóða heims á undanförnum árum, sem gæti brátt markað upphafið að alvarlegri niðursveiflu í alþjóðahagkerfinu.
_____________________________________
Nánar er fjallað um málið í erlendum fréttum Viðskiptablaðsins á morgun.
Áskrifendur geta, frá klukkan 21 í kvöld, lesið blaðið á pdf-formi hér á vefnum. Þeir áskrifendur sem ekki hafa sótt um aðgangsorð til að lesa blaðið á vefnum geta gert það hér .
