Hildur Ólafsdóttir hefur verið ráðin framkvæmdastjóri Rafarnarins. Hún tekur við starfinu af Smára Kristinssyni, sem hefur gegnt því í 30 ár, en hann er einn stofnenda fyrirtækisins. Hildur hóf störf hjá Raferninum árið 2011 og hefur gegnt stöðu sviðsstjóra rannsóknar- og þróunarsviðs fyrirtækisins undanfarin ár.
Hildur lauk mastersgráðu í verkfræði með áherslu á hagnýta stærðfræði frá Danmarks Tekniske Universitet árið 2004. Hún lauk doktorsprófi frá sama háskóla árið 2008 með sérhæfingu í hagnýtri stærðfræði og sjálfvirkri myndgreiningu á heilbrigðissviði. Í starfi hennar sem sviðsstjóra hjá Raferninum hafa verkefni m.a. snúist um þróun á gæðakerfum fyrir myndgreiningar- og geislameðferðardeildir. Þessi verkefni hafa verið unnin í samvinnu við erlenda samstarfsaðila.
Raförninn hefur í rúma þrjá áratugi veitt tækniþjónustu, víðtækra ráðgjöf og hugbúnaðarþróun innan heilbrigðisgeirans.
Í upphafi var fyrirtækið aðeins með einn starfsmann í hlutastarfi en í dag eru 20 starfsmenn hjá fyrirtækinu sem sinna bæði innlendum og erlendum verkefnum. Raförninn er í eigu verkfræðistofunnar Verkís.
